Доржсүрэнгийн Болдбаатар
Хятад судлаач, орчуулагч

Зорилготой амьдрахуй

2018 оны 9 сарын 32018-09-03

Хүний амьдралд зорилгоо зөв тодорхойлох явдал хамгаас чухал зүйл байж мэдэх юм шүү. Хүнийг ерөнхийд нь сайн муу гэж хуваадаг шиг зорилготой хүн, зорилгогүй хүн гэж хувааж болмоор санагддаг.

Зорилго дотроо том, жижиг гээд янз бүр байж болох. Өдөр, сарын зорилгыг "төлөвлөгөө" гэж өөрөөр нэрлэх тохиолдол бий. Уг чанартаа бас л нэг төрлийн зорилго болой. Ер нь зорилго дотроо амьдралын, ажил хэргийн, холын, ойрын, гол, гол бус гээд олон төрөл зүйлтэй байдаг. Өнгө хээ талаас нь зорилгыг зөв, буруу, сайн муу хэмээн нэрлэж болно.

Зорилго бодитой, өөрийн хэр чинээнд тохирсон байх нь зохистой. Тэр бүх хүрээ хязгаараас даван гарсан тохиолдолд зорилго биш хийрхэл болон хувирч мэдэшгүй.

Хүний амьдралын цаг үе бүхэнд өөр өөр зорилго урган гарч болно. Гэхдээ нэг хэлэх гээд халгаж ядаад байгаа нэг зүйл бол зорилгоо хатуу, цэгцтэй тодорхойлчихсон хүн цөөхөн талдаа байх гээд байдаг шүү. Бас осолгүй нэг зорилго тавьчихсан хэр нь түүнийгээ гүйцэлдүүлэх арга эвээ олохгүй нь ч бас цөөнгүй байдаг шиг.

Ер нь амьдралын урт холын замд хүн бүрийн хувьд амжилт ололт, ялагдал бүтэлгүйтэл гээд гээд аль олон зүйл тохиолдохыг тэр гэхэв. Амьдралын энэ тод өнгө ялгарлын шийдвэрлэх хүчин зүйл зорилготой эс бөгөөс зорилгогүй гэдгээс шалтгаалдаг ч болох юм. Энэ утгаар хүүхэд залууст зорилготой амьдрахын утга учрыг томчууд бид эртнээс хэлж ойлгуулж байх хэрэгтэй л дээ.

Зорилготой амьдарч сурахын хамгийн том урьдач нөхцөл нь эхлээд жижиг буюу ойрын зорилгыг оновчтой зөв тодорхойлох, бүр тодорхой хэлбэл өдрийн зөв дэг тогтоогоод түүнээ ягштал баримтлаж дадахаас эхлэдэг ч байж мэдэх юм шүү.

Таны тавьсан зорилго өөртөө болоод өрөөл бусад олон хүмүүст тустай байж чадах эсэхээс түүний агуулга, хүч чадал тодорхойлогдож таарна. Харин зөвхөн идэж уух, өмсөж зүүх тэргүүтнийг өдөр тутмын амьдралын зорилго болгочихоод урсгалаараа явж байдаг ганц нэг хүн байваас адгуусны амьдралын зорилгын тэн хагас нь бараг дээрх агуулгаар тодорхойлогдох бус уу гэдгийг сайтар бодож үзмээр.

Та энэ бичлэгийг уншиж суух зуур өөртөө "Миний тавьсан байгаа зорилго юу билээ?" гэж эргэцүүлээд үзэхэд гэмгүй. Дорно дахинд зорилготой амьдрах ухааныг "Зоригийг олохуй" хэмээн сайхан нэрлэсэн нь буй. Та зоригийг олж зорилгоо тодорхойлж чадсан уу?

Хичээлийн агуулгадаа ийм сэдвийг оруулж зорилгоо тодорхойлох арга зүй, түүнд хэрхин богино дөт замаар хүрдэг арга ухааныг заадаг сургууль манай улсад хэд байдаг бол гэдэг талаар хичээлийн шинэ жилийн эхний өдөр бодогдсон хэд гурван үгсийг хэлхиж та бүхний гэгээн мэлмийд толилуулавай.

Санал болгох

Сайдаар ажиллуулах ШАГНАЛ ба ХАРИУЦЛАГА

Үндсэн хуулийн нэмэлтийн дараах үйл явцаас эхлээд Засгийн газрын УИХ-д үзүүлэх жин нөлөө их боллоо. Дан дээлтнүүдийг давхар дээлтнээр сольж, нэмээд Түгжрэлийн, Олимпизмын, Боомтын зэрэг яамгүй сайдууд нэмснээр Засгийн газар УИХ-аар бодлогоо дэмжүүлэхэд товчлуурын хувьд амар болсон хэдий ч хууль тогтоох засаглал, гүйцэтгэх засаглалын хяналтын тэнцвэр алдагдлаа гэж судлаачид яриад байгаа. Гүйцэтгэх засаглалаа хянадаг парламент байхын тулд УИХ-ын гишүүдийнхээ тоог нэмэх шаардлага үүсч байгаа нь дээр дурдсан ҮХНӨ-ийг даруй хийх шаардлагыг тулгаж байна.

6 өдрийн өмнө
БНХАУ-аас Монголд хар тамхи оруулж ирдэг бүлэглэл төлбөрөө биткоиноор хийжээ

Манай улсад мансууруулах эм, сэтгэцэд нөлөөт бодисын хууль бус эргэлттэй холбоотой далд байсан гэмт хэргийн санхүүжилт криптоны зах зээлээр дамжиж, Монгол Улсын дотоод аюулгүй байдал, хүн ам, удмын сангийн аюулгүй байдалд шууд заналхийлж байгаа нь аюулын харанга болж байна.

13 өдрийн өмнө
 “Ноён эмэгтэй” ноёлсонгүй

Хүсэл, шунал, өш хонзон, хараал зүхэл... Энэ бүгдийг  “Ноён эмэгтэй”-гээс  харж болохоор. Киноны үйл явдал  1974 оноос эхлэлтэй.

21 өдрийн өмнө
Эдийн засгийн амьд үлдэх РЕФОРМ

Энэ жил монголчуудын хувьд урд хормойгоо хойд хормойгоор ч нөхөж чадахааргүй хүнд сорилт хүлээлж байгааг эдийн засагчид сануулсаар.

1 сарын өмнө