Хүүхдийн тоглоомын талбай хогийн цэг болон хувирсан нь оршин суугчдын хувьд том асуудал биш. Байрныхаа үүдээр гарахад л баасан дээр гишгэчихэж магадгүй энэ дүр зураг өнөөгийн нийслэлийн нэгээхэн төрх.
Баянзүрх дүүргийн 12 дугаар хороонд буй 69 дүгээр байр нь 1958 онд баригдсан бөгөөд сайд дарга нарын байр гэгддэг байж. 60 жилийн настай энэхүү 69 айлын орон сууц нь цэвэр, бохир усны шугамд холбогдоогүй, халаалтгүй, хогийн цэггүй. Тиймээс айл бүхэн бохир ус, хогоо хүүхдийн тоглоомын талбай дээрээ асгадаг. Эвдрэн ёрдойсон дасгалын хоёр төхөөрөмжөөс өөрөөр энэ газрыг тоглоомын талбай гэж харах боломжгүй. Гэвч хүүхдүүд энд тоглодог. Хот тохижилт, нийтлэг үйлчилгээний газар хогийг сард нэг удаа ачих хуваарьтай ч хуваарьт өдрөө ачдаггүй, хур хогийг хоёр сард нэг удаа хугасалдаг хэмээн оршин суугчид бухимдаж байна.
Уг газрыг гэр хорооллын дахин төлөвлөлтөөр аваад багагүй хугацаа өнгөрч байгаа юм. Энэ хүрээнд айлуудын хашааг чөлөөлүүлсэн ч 69 дүгээр байрыг нураах, эсвэл энэ хэвээр үлдээн засч сайжруулах талаар оршин суугчидтай тохиролцоогүйг тэд хэлж байна. Уг байрны газар нь нэгэнт газар дахин төлөвлөлтөд орсон тул байраа суллан, шинэ байранд орохоор оршин суугчид нь хүлээсээр дөрвөн жил өнгөрчээ.
69 дүгээр байрны дэргэд 12 дугаар хорооны байр, өрхийн эмнэлэг байрладаг. Гэвч хорооны зүгээс хогийг яаралтай ачуулах, орчинг бүхэлд нь цэвэрлэн ариутгах талаар дорвитой ажил хийдэггүйд оршин суугчид нь цөхөрчээ. Бохир ус, бие засах газраас хальсан бохир, хур хог холилдсон энэ газар халдварт өвчин дэгдэх өндөр эрсдэл байна. Гэр хорооллын дахин төлөвлөлт ажил хэрэг болох, тэр өдрийг хүртэл ядаж хогоо хурштал нь хадгалдаг байдлыг засч залруулах шаардлага байна.
