Монгол Улс нэг жилийн хугацаанд 200 мянган ширхэг лавлагаа "үйлдвэрлэдэг". Эдгээрийн ихэнхийг төрийн үйлчилгээ авахад шаарддаг нь иргэдэд хүндрэл учруулдаг. Тиймээс Монголын төр өөртөө байдаг мэдээллийг иргэдээс шаардахгүй байхаар хуулийн өөрчлөлт боловсруулжээ. Энэ хуулийн төслийг ирэх хаврын чуулганаар хэлэлцэн батлахаар хууль санаачлагчид зэхээд байгаа бөгөөд нийтдээ таван төрлийн бичиг баримтын хуулбар, лавлагааг иргэдээс төрийн байгууллага, банк санхүүгийн байгууллага шаардахаа болих юм.
Тодруулбал, хууль батлагдсанаар гэрлэсэний лавлагаа, иргэний үнэмлэхний лавлагаа, оршин суугаа газрын лавлагаа, эд хөрөнгийн бүртгэлийн лавлагааг төр иргэдээс шаардахаа болих нь ээ. Банк санхүүгийн байгууллагууд иргэдийн мэдээллийн санд нэвтрээд аливаа мэдээллийг өөрөө нягтална гэж мэдээлэв. Ингэснээр аливаа залилангийн гэмт хэргээс урьдчилан сэргийлэх боломж ч бүрдэнэ гэж Хууль зүй дотоод хэргийн яамнаас тайлбарлалаа.
