“Монголиод” гэж бичсэн зохиолч хүлцэл өчжээ

Дэлхий / Admin
2017 оны 11 сарын 07

Эрүүл хооллолт, хүнсний технологийн чиглэлээр дэлхийд танигдаад буй шилдэг зохиолч, нийтлэлч Либб Вивер уншигчдаасаа хүлцэл өчиж, хамгийн сүүлд 20 мянган ширхэг хэвлүүлсэн номоо худалдаанаас буцаан татахаар шийджээ. Учир нь тэрбээр шинэ номондоо “Монголиод”, “Монголизм” гэх үг ашигласан нь Монгол Улсын нэр хүнд, иргэдийг нь доромжилсон үйлдэл боллоо гэх шүүмжлэл ирсэн учраас ийнхүү олон нийтээс хүлцэл өчиж, номоо сэргээн засварлахаар болжээ.

Энэ талаар ВВС агентлаг мэдээлсэн байна. Австралийн зохиолч Либб Вивер фэйсбүүктээ шууд дамжуулалт хийж, олон нийтээс хүлцэл өчсөн байна. “Монголиод”, “Монголизм” гэх мэт үгсийг зарим мэдээлэл хүрээгүй оронд 1980-аад он хүртэл дауны синдром, хромсомын гажиг эмгэгтэй хүмүүсийг нэрлэх зэргээр ашиглаж байсан ба тэр цагаас хойш хориглосон юм.

Жартгар нүд, өргөн дух, жижиг хамар гэх мэт онцлогоос нь болж монголчуудыг энэ төрлийн синдромтой хүмүүстэй нэг нэршилд адилтгаж байсан нь НҮБ-ын Хүний эрхийн комисс гэх мэт байгууллагын шүүмжлэлд өртсөн учраас дэлхийн ихэнх оронд уг хэллэгийг буруу ойлголт хэмээн ухуулах болсон байна.

Шинэ номондоо монголчуудыг доромжлох утгатай “Монголиод” гэх үгийг ашигласан зохиолч Либб Вивер “Үүнээс хойш аливаа нэршил, утга агуулгын талаар нарийн судалж, бусад улс үндэстнийг доромжлон, гутаах агуулгатай үг хэллэг ашиглахаас эрс зайлсхийх болно. Дауны синдром эмгэгээр өвдөн шаналж буй хүмүүс, тэдний ар гэрийнхнээс чин сэтгэлээсээ хүлцэл өчье. Цаашид дауны синдром эмгэгийг хар, буруу хэллэгээр нэрлэхгүй” хэмээн ярьжээ.

Т.Бат