БХБЯ-ны ахмад ажилтанг хууль бусаар халсан нь тогтоогджээ

Нийгэм / Admin
2018 оны 06 сарын 06

Барилга, хот байгуулалтын яамны Төрийн нарийн бичгийн дарга С.Магнайсүрэнгийн гаргасан шийдвэрээс болж тэтгэвэрт гарахад хэдхэн сар дутуу байсан ахмад ажилтан ажлаас халагдан хохирч, тэтгэвэрт гарахад авдаг нэг удаагийн мөнгөн тэтгэмжээ авах боломжгүйд хүрчээ. Тиймээс ахмад ажилтан Т шүүхэд хандсанаар гурван шатны шүүхэд ялалт байгуулж, заргаа авч чадахаар болсон байна.

Иргэн Т нь Барилга, хот байгуулалтын яамны Стратеги, бодлого төлөвлөлтийн газрын Норм, нормативын хэлтэст ахлах мэргэжилтнээр ажиллаж байгаад тус яамны Төрийн нарийн бичгийн дарга С.Магнайсүрэнгийн 2016 оны наймдугаар сарын 9-ний өдрийн тушаалаар тус яамны бүх ажилтныг "Яамдын зохион байгуулалтын бүтэц, орон тооны хязгаар батлах тухай" Засгийн газрын 2016 оны 13 дугаар тогтоолыг үндэслэн чөлөөлөхөд ажлаасаа чөлөөлөгдсөн байна.

Мөн өдрөө халагдсан ажилтнуудыг ажилд нь эгүүлэн томилох тушаал гарахад иргэн Т-гийнх байгаагүй ажээ. С.Магнайсүрэн "Ажилд томилоогүй байгаа нэр бүхий хүмүүс надтай уулз" гэж хэлсэн бөгөөд иргэн Т-г "Та өргөдлөө бичээд өг" хэмээсэн байна.

Иргэн Т барилгын салбарт 37 жил, төрийн албанд 28 жил ажилласан, долоон сарын дараа буюу 2017 оны гуравдугаар сарын 26-ны өдөр 60 нас хүрэх учир ажилд томилж өгөхийг хүсч өргөдөл бичиж өгсөн байна.

Түүнийг ажлаа сураглан очих бүрт "Чамайг ажилд авна л гэсэн бол авна, түр хүлээж бай, ирээд яах вэ, утсаар дуудна. Та тэтгэвэрт гарах дөхсөн юм чинь хувиараа нийгмийн даатгалын шимтгэлээ төлж байсан нь дээр байх. 2017 он гараад орон тоо нэмэгдэнэ, тэгэхэд таныг ажилд авна" гэсэн тул тэрбээр нийгмийн даатгалын шимтгэлээ өөртөө нэмж учрах хохирлоос хугаслахын тулд хувиараа төлж байжээ.

Ийнхүү ажилд авахыг хүлээсээр 60 нас ч хүрч. Энэ хугацаанд салбарын сайд Г.Мөнхбаяртай таван удаа уулзсан байх юм. Гэвч сүүлдээ ажилд авахгүй нь тодорхой болсон тул хууль ёсны дагуу тэтгэврээ тогтоолгосон байна. Тэрбээр 28 жил төрийн алба хашихдаа ямар нэг ажлын хариуцлага, хөдөлмөрийн сахилга бат алдсан ямар нэг зөрчил дутагдал гаргаж байгаагүй учир Хөдөлмөрийн гавьяаны улаан тугийн одон хүртэлх шат дараалсан шагнал урамшууллыг төрөөс хүртэж, Монгол Улсын зөвлөх инженер болжээ.

Гурван шатны шүүхээс Төрийн албаны тухай хуулийн дөрөвдүгээр зүйлийн 4.2.5, 27 дугаар зүйлийн 27.2.1, 30 дугаар зүйлийн 30.2, Захиргааны ерөнхий хуулийн 4 дүгээр зүйлийн 4.2.5, 100 дугаар зүйлийн 100.1, 101 дүгээр зүйлийн 101.1, 101.2-т заасныг баримтлан нэхэмжлэгч Т-ын нэхэмжлэлийн шаардлагыг бүхэлд нь хангаж, Барилга, хот байгуулалтын яамны Төрийн нарийн бичгийн даргын ажилд томилоогүй эс үйлдэхүйг хууль бус болохыг тогтоожээ.

Улмаар нэхэмжлэгч Т-г 2016 оны наймдугаар сарын 9-ний өдрөөс 2017 оны тавдугаар сарын 9-ний өдөр хүртэл ажилласнаар тооцож, нийт есөн сарын хугацааны цалинд 9670608 төгрөг олгохыг, холбогдох суутгал хийхийг, нэг удаагийн буцалтгүй тусламжид нийт 23.400.489 төгрөгийг тус тус хариуцагч Барилга, хот байгуулалтын яамнаас гаргуулан нэхэмжлэгч Т-д олгуулахаар шийдвэрлэжээ.