10 жил хүлээгдсэн Сайншандын салхин парк энэ оны сүүлээр ашиглалтад орно

Эдийн засаг / Т. Сарангуа
2018 оны 03 сарын 27

Сайншандын салхин парк ашиглалтанд орсноор 200 мянган тонн нүүрсхүчлийн хий ялгарахаас сэргийлнэ

Image result for сайншанд салхин

Дорноговь аймгийн Сайншанд хотын ойролцоо, Монголын гурав дахь салхин станц болох Сайншандын салхин паркийн бүтээн байгуулалтын ажил өнгөрсөн онд эхлээд, одоо барилгын ажил үргэлжлэн явж байна. Өмнө нь ашиглалтад орсон Салхит болон Цогтцэций салхин станцуудтай харьцуулахад 5 мегаваттаар илүү буюу 55 мегаваттын хүчин чадалтай энэхүү салхин паркийн төсөл нь 2009 оноос хойш удаан хугацааны турш хүлээгдсэний эцэст ийнхүү санхүүжилтийн асуудал нь эцэслэн шийдэгдэж, барилгын шатандаа ороод байгаа юм. 

Сайншанд салхин парк ХХК-ийн захирал Оливер Шнорр “Сайншандын салхин паркийн төсөл үнэндээ маш олон жил яригдсан. Бараг 10 жил болж боллоо. Учир нь сүүлийн жилүүдэд Монгол Улсад хөрөнгө оруулалт татахад ихээхэн бэрхшээлтэй байсан. Өнгөрсөн хугацаанд таван Ерөнхий сайд, Засгийн газрын бүрэлдэхүүн солигдсон. Гэхдээ бид тэвчээртэй, тайван хүлээж чадсаны үр дүнд ажлаа эхлүүлж чадлаа. Бид өнгөрсөн аравдугаар сард барилгын ажлаа эхлүүлээд, өвөл хэсэг хугацаанд завсарласны эцэст хэдэн долоо хоногийн өмнөөс эргээд ажилдаа ороод байна. Бид төлөвлөсөн цаг хугацаа, төсөвтөө багтаан барилгын ажлаа арван нэгдүгээр сар гэхэд бүрэн дуусгана гэж найдаж байна” гэв.

Сайншандын салхин паркийн төслийн үр дүнд нийт 120 сая ам.долларын шууд хөрөнгө оруулалт Монгол улсад орж ирж байгаа. Барилгын ажлын оргил үед нь 500 орчим ажлын байр бий болно. Харин салхин парк ашиглалтанд орсны дараа тогтмол 30-40 хүнийг ажлын байраар хангах боломжтой. Сайншандын салхин парк нь 100 мянга орчим өрх айлыг эрчим хүчээр хангах хүчин чадалтай бөгөөд цахилгаан дамжуулах үндэсний сүлжээнд холбогдсоноор, дотоодын эрчим хүчний нийлүүлэлтэнд хувь нэмрээ оруулах юм. Мөн 55 мегаватт хүчин чадалтай байгаль орчинд ээлтэй эрчим хүчний эх үүсвэр нь  200 мянган тонн нүүрс хүчний хийг агаар мандалд ялгарахаас сэргийлнэ. 

Манай улсын хувьд нар, салхины эрчим хүчний арвин их нөөцтэй оронд тооцогддог. Сэргээгдэх эрчим хүчний салбарынхан Монгол улсыг гадагшаа эрчим хүч экспортлогч болох бүрэн боломжтой гэж харж байгаа. 

Салхины эрчим хүчний салбарт дахиад гурван ч төсөл яригдаж байна. Өмнөговийн Ханбогд сумын нутагт Оюутолгойн эзэмшил талбайн дэргэд 240 мегаваттын салхин паркийн төсөл хэрэгжихээр хөрөнгө оруулалтын шатандаа явж байгаа бол, Чойр орчимд хоёр ч салхины эрчим хүчний төсөл хэрэгжиж байгааг Монголын Сэргээгдэх Эрчим Хүч Үйлдвэрлэгчдийн Холбооноос мэдэгдлээ.