Мияконожо хотын орлогч дарга Ивасаки Торуг хүлээн авч уулзлаа

2019 оны 10 сарын 222019-10-22
Мияконожо хотын орлогч дарга Ивасаки Торуг хүлээн авч уулзлаа

Нийслэлийн Засаг дарга бөгөөд Улаанбаатар хотын Захирагч С.Амарсайхан өчигдөр Япон улсын Мияконожо хотын орлогч дарга Ивасаки Тору тэргүүтэй төлөөлөгчдийг хүлээн авч уулзлаа. Уулзалтад Нийслэлийн Хүний хөгжил, нийгмийн бодлогын асуудал хариуцсан орлогч Ш.Анхмаа, НЗДТГ-ын Гадаад харилцаа, хамтын ажиллагааны хэлтсийн дарга Д.Чинзориг, Мияконожо хотын Бодлого зохицуулалтын газрын дарга Ёшинага Тошихиро, Мияконожо хотын Олон улсын сурталчилгааны албаны дарга Моришигэ Тацүми нар байлцав.

Нийслэлийн Засаг дарга бөгөөд Улаанбаатар хотын Захирагч С.Амарсайхан “Улаанбаатар хот Япон улсын хотуудаас хамгийн анх Мияконожо хоттой 1999 онд найрамдалт харилцаа тогтоосноос хойш өдгөө 20 жил өнгөрсөн байна. Энэ хугацаанд хоёр орны харилцаа, хамтын ажиллагаа олон салбарт өргөжин хөгжиж байгаад талархалтай байдаг. Хоёр орны харилцаа, хамтын ажиллагааны хүрээнд сурагч солилцооны хөтөлбөрийг 2014 оноос амжилттай зохион байгуулж ирсэн. Манай сурагчдыг халуун дотноор хүлээн авч Япон улсын түүх соёл, уламжлалтай танилцах боломж олгосонд баяртай байна. Энэ жил танай хотын сурагчдыг Улаанбаатар хотноо хүлээн авч, Монголын түүх соёл, уламжлалыг танилцуулсан. Хоёр хотын оюутан солилцооны хөтөлбөр үр дүнгээ өгч байна гэж хардаг. Цаашид соёл, хүмүүнлэг, боловсрол гээд олон салбарт хамтын ажиллагаагаа өргөжүүлэхэд бэлэн гэдгээ илэрхийлье” хэмээлээ.

Мияконожо хотын орлогч дарга Ивасаки Тору “Мияконожо хот соёл, боловсрол, спортын салбарт танай хоттой цаашид хамтын ажиллагаагаа улам өргөжүүлэх хүсэлтэй байна. Өнгөрсөн хугацаанд сурагч солилцоо болон чөлөөт бөхийн спортоор туршлага солилцсон. Мөн өөр олон салбарт ч гэсэн харилцан туршлага солилцож, хамтарч ажиллах боломж манай хоёр хотод бий гэж харж байна” гэлээ.

Уулзалтын төгсгөлд хоёр хотын бизнес эрхлэгч, үйлдвэрлэгчид болон ХАА салбарын аж ахуйн нэгжүүдийг хооронд нь холбож өгөх замаар бүх салбарын үйл ажиллагааг өргөжүүлэхэд талууд хамтарч ажиллахаар санал солилцсон юм.

Нийслэлийн ЗДТГ-ын Хэвлэл мэдээлэлтэй харилцах хэлтэс

Санал болгох

Эцэг, эхчүүдэд хүүхдэдээ тавих хараа хяналтаа сайжруулах хэрэгтэйг онцлов

Дулааны улирал эхэлсэнтэй холбоотойгоор голын усанд иргэдийг осолдохоос урьдчилан сэргийлэх чиглэлээр өнөөдөр нийслэлийн Онцгой байдлын газрын Гамшгийн шуурхай удирдлагын хэлтсийн дарга Э.Эрдэнэбаатар, Цагдаагийн удирдах газрын Хүүхдийг гэмт хэргээс урьдчилан сэргийлэх хэлтсийн дарга, хурандаа Б.Батзориг, Гэр бүл, хүүхэд, залуучуудын хөгжлийн газрын Хүүхдийн хөгжил, хамгааллын хэлтсийн дарга П.Мягмаржав нар мэдээлэл хүргэлээ.

9 өдрийн өмнө
Нийслэлийн Хөдөлмөр эрхлэлтийн газраас 920 иргэнийг ажлын байраар хангажээ

Нийслэлийн Хөдөлмөр эрхлэлтийн газар энэ сарын 25-ны өдрийн байдлаар давхардсан тоогоор нийт 13014 иргэн, 619 ажил олгогчид үйлчилгээ үзүүлжээ. Ажил зуучлах үйлчилгээний хүрээнд 619 ажил олгогч байгууллагатай хамтран ажиллаж 4821 ажлын байрны захиалгыг төвлөрүүлж, 1885 ажил хайгч иргэнийг шинээр бүртгэн, 920 иргэнийг ажилд оруулсан байна.

9 өдрийн өмнө
Баянхошуунд Нийслэлийн нэгдсэн үйлчилгээний төв үйл ажиллагаагаа явуулж эхэллээ

Улаанбаатар хотын Ерөнхий төлөвлөгөөнд хотын хөгжлийг тэнцвэртэй болгох хүрээнд зургаан дэд төвтэй байхаар тусгасан. “Гэр хорооллыг хөгжүүлэх хөрөнгө оруулалтыг дэмжих хөтөлбөр” төсөл нь уг дэд төвүүдийг бий болгох суурь “Дэд бүтэц”-ийн ажлуудыг хийж байна.

10 өдрийн өмнө
Ч.Хүрэлбаатар: 7009 айлын түрээсийн орон сууц барина

ТОСК-иас хэрэгжүүлж буй эдгээр гурван төслийн хүрээнд баригдах хорооллуудад 7000 гаруй айл түрээсийн орон сууц хөтөлбөрт хамрагдан оршин суух боломжтой болох юм.

10 өдрийн өмнө