С.Баярцогт: Оюу толгойн гэрээний талаар бичсэн миний ном олон жил эх сурвалж, материал болох болно

21
2019 оны 11 сарын 42019-11-04
С.Баярцогт: Оюу толгойн гэрээний талаар бичсэн миний ном олон жил эх сурвалж, материал болох болно

Сангийн сайд асан, С.Баярцогт Оюу толгойн гэрээтэй холбоотой ном хэвлүүлснээ зарлаж, мэдээлэл хийлээ. Тэрбээр:

"...Одоогоос 30 хоногийн өмнө Оюу толгойн гэрээ зурагдсны 10 жилийн ой болсон. Энэ ойг төр засгийн зүгээс дуугүй өнгөрөөсөн, Оюу толгойн зүгээс ч дуугүй өнгөрөөсөн.

2009.10.06-нд Монгол Улс тусгаар тогтносноосоо хойш анх удаа биеэ даасан хамгийн том хөрөнгө оруулалтын гэрээг хийсэн. Энэ хөрөнгө оруулалтын хэмжээ бол хоёр хөршийн хөрөнгө оруулалтаас давсан хэмжээний том өрөнгө оруулалт байсан.

10 жилийн ойг тохиолдуулаад Оюу толгойн гэрээн дээр ажилласан нийт төрийн албан хаагчид, 2008-2012 оны УИХ-ын бүрэлдэхүүн, С.Баярын болон С.Батболдын Засгийн газрын гишүүдэд баяр хүргэх нь зүйтэй гэж бодож байна.

Өнөөдөр та бүхэнтэй уулзаж байгаа зорилго бол би ном гаргасан. “Оюу толгой төслийн 2009 оны гэрээ, холбогдох бичиг баримтууд” гэсэн 500 гаруй хуудастай ном хэвлүүллээ.

Би ийм ном гаргах болсон шалтгааныг нэрлэе.

2018 онд АТГ-аас энэ гэрээг хийсэнтэй холбогдуулаад эрүүгийн хэрэг үүсгэж, тэр дороо намайг 73 хоног хорьсон. Үндэслэл нь энэ гэрээнд Монголд ашигтай нэг заалт оруулж, Монгорл Улсад үр өгөөжийг нь 434 тэрбум төгрөгөөр нэмэгдүүлснийг буруутгасан.

Надад юу гэж бодогдсон бэ гэвэл энэ гэрээний зүйл заалтыг ойлгохгүй байгаа юм байна, сайн мэдэхгүй байгаа юм байна гэх бодол төрсөн. Дараа нь АТГ энэ хэрэгтэй холбоотой 4 бүлэг шинжээч томилсон. Банкны салбарын эдийн засагч нар, МУИС-ын хуулийн багш нар, аудитын компанийн төлөөлөл, татварын ерөнхий газрын байцаагч нараас бүрдсэн 4 хэсэг шинжээч томилсон. Энэ шинжээч нарын гурван хэсэг нь энэ гэрээний талаар сөрөг дүгнэлт гаргаагүй. Татварын газрын шинжээчид бол олон хууль зөрчиж, хохирол учруулсан байна гэх дүгнэлт гаргасан. Үүнээс энэ гэрээг хэрэгжүүлэх ёстой төрийн албан хаагчид мэдлэггүй, мэдээлэлгүй байна гэж бодогдсон.

Шийдвэр гаргагчид маань буруу мэдээлэл аваад, өөрсдөө ойлгохгүйгээсээ болоод буруу шийдвэр гаргах гээд байна. Татварын ерөнхий газраас 41 зүйлийг хөндсөн байгаа юм. Энэ 41 зүйлийг нягтлаад үзэхээр 97 хувь нь алдаатай, үлдсэн нь хэрэгжилттэй холбоотой.

Маш их өрөөсгөл алдаатай дүгнэлтэндээ үндэслээд шүүх шийдвэрээ гаргавал, ямар эрсдэл учирч байна вэ гэвэл бид Оюутолгойгоос авах ёстой олон төрлийн татваруудаа дутуу авах эрсдэл үүсч байна. Олон арван тэрбум ам.долларын татварыг дутуу авах гээд байна. Сэрэмжлүүлэх зайлшгүй шаардлага үүсч байгаа юм.

Гэрээгээ судлахгүй, уншихгүй юм байж гэрээг хэрэгжүүлэх үйл явцад гарсан зөрчил, үл ойлголцлыг дандаа гэрээндээ нялзайгаад байна.

Би Т.Аюурсайхан гишүүнд их талархалтай байгаа. Шинжээчийн материал гэдэг бол мөрдөн байцаах үйл явцад байгаа хавтаст материалд байгаа учраас би ярих эрхгүй. Харин Аюурсайхан гишүүн бүгдийг нь задлаад яриад өгсөн.

Цөөн хувь хэвлэсэн учраас редакц болгонд нэг нэгийг өгье. Мөн том номын сангууд, МУИС, татварын байгууллага гээд газруудад өгнө. Энэ бол олон жил хэрэглэгдэх эх сурвалж, материал болно.

2000 оноос хойш гэрээ хийгдэх хүртэл бүх зүйлийг бичсэн байгаа. Зүйл заалтаар нь шинжээчийн дүгнэлтийг бас оруулсан байгаа” гэлээ.

Сэтгүүлчдийн зүгээс асуулт асуух гэсэн боловч тэрбээр "Энэ ном 500 хуудастай зүйл заалт тус бүрээр нь дэлгэрэнгүй тайлбарласан байгаа. Тиймээс эхлээд номоо унш. Хоёрдугаарт, та нар ихэнх нь жаахан хүүхэд байна. Энэ гэрээг хийгдэх үед оюутан эсхүл сурагч байсан байх. Тиймээс эхлээд номоо уншаад ойлгосны дараа би асуултанд хариулж, ярилцахад бэлэн байна" гэсэн юм.

Санал болгох

Н.Энхболд: Зам хаах шийдвэрийг аймгууд дангаараа гаргах ёсгүй

"Зарим аймгууд дангаараа замын хөдөлгөөн хаах тухай шийдсэн юм билээ. Гэхдээ үүнийг Зам тээврийн яамтай хамтран шийдэх ёстой" гэв

20 цагийн өмнө
Сургууль, цэцэрлэгийн үйл ажиллагаа эхлэх хугацааг гуравдугаар сарын 30-ныг хүртэл сунгалаа

Засгийн газрын өнөөдрийн ээлжит хуралдаанаар өндөржүүлсэн бэлэн байдлыг гуравдугаар сарын 30-ныг хүртэл сунгах шийдвэр гаргасан байна.

1 өдрийн өмнө