Монголчуудын олонхи нь үндэсний томоохон компанийнхаа хувьцааг гартаа атгадаг баян улс. Гэвч түүнийхээ ид шидийг хэзээ хүртэх нь өнөөдрийг хүртэл тодорхойгүй л байна.
Уг нь “Эрдэнэс Тавантолгой” компанийн гүйцэтгэх захирал Б.Ганхуяг “Ногдол ашгийг тус компанийн 1072 ширхэг хувьцааг эзэмшиж буй Монгол Улсын иргэн бүр буюу 2.5 сая иргэн хүртэнэ. Хэдэн төгрөгийн ногдол ашиг, хэзээнээс олгохыг энэ оны 4-р сард болох Хувьцаа эзэмшигчдийн хурлаар шийдэж, Засгийн газарт хүргүүлсний дараа тодорхой болно” хэмээн мэдэгдэж байсан. Гэвч дөрөвдүгээр сар дуусч, тавдугаар сар шувтарч байхад энэ асуудал нам гүм хэвээр байна. Иргэд хэдий хүртэл амьгүй хувьцаа атгаж баян хүний дүр эсгэх вэ.
Хүн сонсоход 1072 гэх их тоо сонсогдож буй ч түүнд ноогдох ашиг нь өчүүхэн хэмээн албаны хүмүүс мэдээлсэн. Тараах мөнгө нь овоохон бол ядуу монголчуудыг минь тэтгэх байлаа. Тийм биш бол одоо бүтээн байгуулалтын улирал эхэлсэнтэй холбоотойгоор хэд хэдэн эмнэлэг, сургууль, цэцэрлэг барьчихаасай гэх хүлээлт олны дунд байсаар байгааг тус компанийн удирдлагуудад дайхыг зорилоо.
