Хотын Захирагчийн “Явуулын оффис” ажиллаж эхэллээ

3.1 мянга
25 өдрийн өмнө
Хотын Захирагчийн “Явуулын оффис” ажиллаж эхэллээ

Нийслэлийн Засаг дарга бөгөөд Улаанбаатар хотын Захирагч С.Амарсайхан хотын даргаар томилогдсоны дараа, иргэдийн дуу хоолойг Хотын дарга сонсох, тэдэнд төрийн үйлчилгээг ойртуулах зорилгоор  "Хотын даргын явуулын оффис” ажиллуулахын зэрэгцээ иргэдийн санал гомдлыг хүлээж авах, хотын даргатай холбогдох  тусгай дугаар ажиллуулна гэдгээ илэрхийлж байсан.

Тэгвэл нийслэлийн Засаг даргын үйл ажиллагааг иргэд, олон нийтэд ойртуулах, тэдний ажил, амьдралд тулгамдсан асуудлыг газар дээр нь шийдвэрлэх зорилготой Засаг даргын “Явуулын оффис” өнөөдрөөс дүүргүүдэд ажиллаж эхэллээ.

Нийслэлийн Засаг дарга бөгөөд Улаанбаатар хотын Захирагч С.Амарсайхан өнөөдөр өглөө Хан-Уул дүүрэг байрласан “Явуулын оффис”-т ажиллаж, тус дүүргийн ерөнхий боловсролын “Буянт-Ухаа” цогцолбор сургуулийн багш, сурагчдын хамт “Номын баяр 2019” арга хэмжээнд оролцохоор Сүхбаатарын талбайд ирсэн юм.

Хотын даргын “Явуулын оффис” болон  “Улаанбаатар сити тур” аяллын автобусаар “Номын баяр”-т оролцохоор ирэх замдаа  хүүхэд багачууд хотын Захирагчтай илэн далангүй яриа өрнүүлж, хүсэл мөрөөдөл, санал бодлоо хуваалцсан. Энэ үеэр нийслэлийн Аялал жуулчлалын газрынхан хүүхэд багачуудын дунд Улаанбаатар хотын түүх, соёлын талаар танин мэдэхүйн асуулт асууж, амжилттай хариулсан хүүхэд бүрт “Бумбардай”, “Явуубаатар” зэрэг ном бэлэглэв. Улаанбаатар хотын Захирагч С.Амарсайхан “Номын баярын өдөрлөгтэй холбоотойгоор өнөөдөр Засаг даргын “Явуулын оффис”-оо нээж, алслагдсан сургуулийн сурагчдын санал бодлыг сонсож, ном уншихын ач холбогдлын талаар тэдэнтэй ярилцлаа. Бидний ирээдүй хойч ямар их хүсэл тэмүүлэлтэй, өмнөө тавьсан том зорилготой байгааг хараад эрхгүй бахархаж байна. Цаашид нийслэлийн Засаг даргын Тамгын газрын ажилтан, албан хаагчид энэхүү явуулын ажлын байранд иргэд, олон нийттэй уулзаж, асуудлыг аль болох газар дээр нь шийдвэрлэх юм” хэмээв.  

Хотын дарга Хан-Уул дүүрэгт ажиллах үеэрээ тус дүүргийн ерөнхий боловсролын “Буянт-Ухаа” цогцолбор сургуулийн үйл ажиллагаатай танилцаж, сурагчидтай уулзлаа. Хотын Захирагчийг тус сургуулийн удирдлагууд болон багш, сурагчид угтан авч, захирал Ө.Болормаа сургуулийн орчин нөхцөл, үйл ажиллагааны талаар танилцуулав. Тус сургуулийн шинээр барьж буй 640 хүүхдийн өргөтгөлийн байрыг ашиглалтад ороход тулгамдаад буй зарим нэг асуудалд нийслэлийн зүгээс дэмжлэг үзүүлж, хугацаанд нь ашиглалтад оруулахад анхаарч ажиллана. Ингэснээр алслагдсан нэг сургуулийн сурагчид  гурван ээлжээр хичээллэдэг хүндрэлтэй нөхцөл байдлаасаа гарах боломжтой болж байгаа  юм.

Сүхбаатарын талбайд нээлтээ хийсэн “Номын баяр 2019” арга хэмжээний үеэр Нийслэлийн Агаар, орчны бохирдлын асуудал хариуцсан төслүүдийн удирдагч Д.Мөнхжаргал “Өнөөдөр хотын даргын “Явуулын оффис” ажиллаж эхэлж байна. 13 дахь жилдээ зохион байгуулж байгаа “Номын баяр-2019” арга хэмжээнд Улаанбаатар хотын алслагдсан сургуулийн сурагчдыг оролцуулахаар “Явуулын оффис”-ын автобусаа халаглан хүрэлцэн ирлээ. Энэ жилийн “Номын баяр”-ын гол онцлог нь нийслэлийн удирдлагуудын зүгээс баримталж буй боловсролын чанарыг дэмжих “Уншлагыг дэмжих 2021” хөтөлбөрийн хүрээнд зохиогдож байгаа явдал юм. Энэхүү төсөл хөтөлбөрийн гол зорилго нь хүн бүр, ялангуяа хүүхэд багачууддаа өдөр бүр 20 минутыг ном уншихад зарцуулдаг дадал хэвшил суулгах явдал. Хүүхдийг төрөхөөс нь эхлээд цэцэрлэг, бага сургууль, их, дээд сургуульд  суралцах бүхий л явцдаа номтой нөхөрлөх дур сонирхолтой, дадалтай болгох нь хамгийн чухал гэдэг. Учир нь ном уншиж, ойлгох чадвар чадамж бол хүний амжилттай сурч мэдэхийн эх үндэс гэдгийг судлаачид тогтоосон байдаг. Тиймээс бид сургуулийн өмнөх боловсролын чанарыг дэмжих үүднээс цэцэрлэгийн багш, эцэг, эхчүүд бага насны хүүхдэдээ ном уншиж өгдөг, цэцэрлэг бүрт номын сантай, уншлагын танхимтай болгох зорилт тавьж ажиллаж байна” гэлээ.

Нийслэлийн  Аялал Жуучлалын газрын дарга Д.Батсүх “Нийслэлийн Аялал жуулчлалын газраас хоёр дахь жилдээ хэрэгжүүлж байгаа “Хотын аялалын автобус” төсөл маань эхлэхэд бэлэн болоод байна. Өнөөдөр Сүхбаатарын талбайд зохион байгуулж байгаа “Номын баяр”-ын үйл ажиллагаанд зориулж, хотын алслагдсан дүүргийн хүүхэд багачуудыг өргөнөөр оролцоход нь бид дэмжлэг үзүүлж байна. Номын баярын гурван хоногийн үйл ажиллагааны үеэр  “Хотын аялалын автобус” маань нийслэлийн алслагдсан дүүрэг хороодын хүүхэд багачуудад үйлчлэх болно. Мөн Улаанбаатар хотын түүх, соёлын талаар мэргэжлийн хөтөч сурагч хүүхдүүдэд ярьж сонирхуулахын зэрэгцээ танин мэдэхүйн асуулт, хариултын тэмцээн явуулж байгаа” хэмээв

Нийслэлийн ЗДТГ-ын Хэвлэл мэдээлэлтэй харилцах хэлтэс

Санал болгох

Зуслангийн болон шөнийн автобусаар үйлчилж эхэллээ

Зуны улирал эхэлж Зуслан чиглэлийн иргэдийн зорчигч урсгал нэмэгдсэнтэй холбоотойгоор Зуслангийн чиглэлийн нийтийн зорчигч тээврийн үйлчилгээг зургаадугаар сарын 15-ны өдрөөс гурван чиглэлд явуулж эхэлжээ.

4 цагийн өмнө
Иргэдэд хууль, эрх зүйн зөвлөгөө үнэ төлбөргүй өгнө

“Нийслэлийн иргэдийн хууль, эрх зүйн боловсролыг дээшлүүлэх” дэд хөтөлбөрийн хүрээнд Нийслэлийн Засаг даргын Тамгын газар, Монголын Хуульчдын холбоотой хамтран сар бүрийн 3 дахь долоо хоногийн Лхагва гаригт иргэдэд хууль, эрх зүйн үнэ төлбөргүй зөвлөгөө, туслалцаа үзүүлэх өдөрлөгийг зохион байгуулдаг юм.

6 цагийн өмнө
“Геодези, зураг зүйчид”-ийн нэрэмжит талбайтай болно

Монголын “Геодези, зураг зүйчид”-ийн нэрэмжит талбайг Үндэсний цэцэрлэгт хүрээлэнд байгуулахаар энэ сарын 15-ны өдөр шав тавих ёслолын арга хэмжээ зохион байгууллаа.

12 цагийн өмнө
Тусгай зөвшөөрөлгүй үйл ажиллагаа явуулж байсан эмнэлгүүдийн үйл ажиллагааг зогсоолоо

Сүхбаатар дүүрэгдэх мэргэжлийн хяналтын хэлтсээс дүүргийн нутаг дэвсгэрт байрлах эмнэлгүүдэд хяналт шалгалт явууллаа.

1 өдрийн өмнө