Коронавирус: Далай лам арга хэмжээгээ хойшлуулав, Гэтэл Монголд?

2
2020 оны 2 сарын 142020-02-14
Коронавирус: Далай лам арга хэмжээгээ хойшлуулав, Гэтэл Монголд?

 

Шинэ төрлийн коронавирусийн халдвар 26 улсад бүртгэгдэж, 64 мянга гаруй хүн өвчлөөд байна. Дэлхийн эрүүл мэндийн байгууллага халдварын эсрэг онцгой байдал зарлаж, олон орон Монгол шиг хилийн хязгаар тогтоосон. Энэхүү өвчин БНХАУ-аас гарсан бөгөөд тус улсын Цагаан сартай давхцаж, баяр тэмдэглэхээр олон сая хүн нутаг сэлгэсэн нь халдвар тархах үндсийг бүрдүүлсэн.

Удахгүй монголчууд цагаан сараа тэмдэглэнэ. Монголчууд үндэснийхээ хамгийн том баярууд болох Наадам, Цагаан сараар хамгийн их нутаг сэлгэн зорчдог. Өөрөөр хэлбэл, коронавирусийн халдвар орж ирвэл хамгийн хурдан тархах магадлалтай баяр удахгүй болох гэж байна. Ийм учраас Эрүүл мэндийн яам санал гаргаж ҮАБЗ-өөр хэлэлцүүлэн Ерөнхийлөгч зарлигаа гаргаж үндэсний баяраа гэр гэртээ даруухан тэмдэглэхийг уриалаад байна.

Хотын дарга захирамж гаргаж, Засгийн газар тогтоол гаргаж олон нийтийн арга хэмжээ зохион байгуулахыг хориглосноос гадна олон хүн цуглах боломжтой кинотеатр, цахим тоглоомын газар зэргийг хаалаа. Сургууль, цэцэрлэг, өдөр өнжүүлэх төвүүдэд хөл хорио тогтоолоо. Монголд коронавирус орж ирээгүй байхад шүү.

Энэ бол цагаа олсон, гурван сая иргэнээ, тэр дундаа хүн ам шигүү суурьшсан нийслэлийн иргэдээ бодож байгаа шийдэл. Өвлийг өнтэй давсан монголчууд төрөл садандаа очиж золгодог, бөхөө үздэг, шинийн нэгний нар угтдаг, шинийн 15-ндаа багтаж заслаа хийлгэж, даллагаа авахуулдаг. Улсын хэмжээнд өндөржүүлсэн бэлэн байдал зарласан учрөаас золгуут хийхээс бусдыг хорьсон гэж ойлгох хэрэгтэй.

Жишээ нь, Гандантэгчэнлин зэрэг шашны байгууллага олон түмнийг цуглуулсан арга хэмжээ зохион байгуулахыг хориглосон гэж Нийслэлийн Мэргэжлийн хяналтын газрын улсын ахлах байцаагч албан ёсоор мэдэгдсэн. Гэтэл өнөөдөр Төв гандангийн тэргүүн хамба, гавж Д.Чойжамц, "Хүнд байдаг дөрвөн эрхийг дайн самуунтай үед ч хөндөж болдоггүй. Эдгээрийн нэг нь шашин шүтэх, эс шүтэх эрх. Бид л коммунист болчихоод байгаа болохоос хүний эрхийг дээдэлдэг, шүтлэгтэй оронд номоо унш л гэдэг шүү дээ. Бид бол номоо хурдгаараа хурна. Сүсэглээд ирсэн олныг оруулахгүй, гаргахгүй гэж болохгүй. Олны хөдөлгөөн тасрахгүй байхыг бид мэдэхгүй. Олон түмэн өөрсдөө шийднэ" гээд хэлчихлээ. Дээр нь бас "Коронавирусийн халдварийн эсрэг тусгай үрэл бүтээж байгаа. Энэ үрэлийг бүх хүнд өгөхгүй. Зөвхөн сүсэгтэй хүнд л өгнө" гэв.

Төр, сүм хийдийн харилцааны тухай хуульд, төр нь шашнаа хүндэлж, шашин нь төрөө дээдэлнэ гэж бичсэн. НМХГ бол Үндэсний аюулгүй байдлын зөвлөл, Монгол Улсын Төрийн тэргүүнээс гаргасан шийдвэрийг биелүүлэхийг шашны байгууллагуудад анхааруулсан. Гэтэл монголчуудын хүндэлдэг хамба маань төрийнхөө шийдвэрийг ойшоохгүй байгаа мэт. Харин ч сүсэглээд өөрсдөө ирвэл коронавирусээс хамгаалах үрэл өгнө шүү гэж даллаад байгаа мэт санагдав. Лам нар буян санаж номоо уншдагаараа уншиж болно, хэн ч хориогүй. Харин хашааны хаалгаа хаачихаад маань мэгзэмээ телевизээр дамжуулаад сүсэгтэн олондоо хүргэж болох асуудал шүү дээ. Монголын телевизүүд цэцэрлэг, сургуулийн хичээлийг зурагтаар дамжуулаад болж л байна. Ламын буяны сэтгэл, номын хүч, ард олны сүсэг бишрэл хэвээр байгаа бол утсаар ч, зурагтаар ч ном айлдвар тавьсан яах вэ дээ.

Цаана чинь, Далай лам хүртэл олныг хамруулсан үйл ажиллагаануудаа коронавирусийн халдвар намжтал зогсоож байгаагаа мэдэгдлээ гэж CNN мэдээлжээ. Харин Монголд яаж байна?

 

 

 

Санал болгох

Дарга нарыг ТӨСВИЙН МӨНГӨӨР ШАНГРИЛЛАД тусгаарлахаар ярьж байна

Гадаадаас эх орондоо ирсэн монголчууд төлбөрөө өөрсдөө төлөөд тааруухан хоолтой зочид буудлуудад тусгаарлагдаж байгаа. Шуурхай штабынхан өдөр болгон шахуу, “Үхрийн махтай шөл нэхлээ, интэрнэт нэхлээ” гэж тусгаарлагдсан иргэдийг телевизээр ховлож, зэмлэдэг. Гэтэл Монголын дарга нар тусгаарлагдах болохоороо таван одтой Шангриллад татвар төлөгчдийн мөнгөөр 21 хононо гэдэг байж болох уу. Саяхан л нийслэлийн зарим газар, хэлтсийн дарга нарт нэг сая төгрөгийн урамшуулал олголоо гэсэн шүүмжлэл унтраагүй байтал төрийн албаныхан ийм өндөр үнээр тансаглал хүртэхээсээ ичихгүй юу.

7 өдрийн өмнө
Цэрэг гангараа буюу учир начир

Цэргийн улстөрийн ажилтан байсан У.Хүрэлсүх гэхэд энэ зэргийг гадарлах учраас хамгаалагчийн хувцас өмсөөд пионер ёсолгоо хийгээд аргалаад байна. Эсвэл Г.Занданшатар гэхэд хүнээр загвар гаргуулаад мэргэжлийн хяналтын байцаагчархуу хөх форм өмсөөд, зохих газраа гангараад байна. Мэдрэмжгүй зарим нь, сургууль цэцэрлэгийн бэлтгэл ажилтай танилцахдаа цэргийн хээрийн хувцас өмсч олны доог болох юм даа.

1 сарын өмнө
Ерөнхийлөгчийн "юм"-ыг наадмаас ч өмнө өчнөөн дэмжжээ

Үг, үйлдэл нь өчнөөн зөрдөг Ерөнхийлөгчид Майдар төсөл дээр ч 233 хятад ажилчин оруулж өгснийг мартаагүй байлтай.

3 сарын өмнө
Н.Эрдэнэхүү: М.Билэгт гишүүний Энэр мед эмнэлэг мэс заслын өрөөгүй учраас түрээслэх нь улсад ашиггүй

УИХ-ын гишүүн М.Билэгтийн өмчлөлд хамаарах “Ачлал Трейд” ХХК-ийн охин компани болох “Энэр Мед” ХХК-ийн Эмнэлгийн зориулалттай гэгдэх барилга нь Мэс заслын ямар ч өрөөгүй тул тухайн барилгыг түрээсээр ашиглах боломжгүй болсон. Улмаар Хавдар судлалын үндэсний төвөөс хууль зүйн үндэслэлийн дагуу, мөн мэс заслын тусламж үзүүлдэг тасаг нэгжийн эрхлэгч нарын шийдвэрийг үндэслэн тус “Энэр Мед ХХК нь өөрийн түрээслүүлэх гэж буй барилгадаа хагалгааны 4 өрөөг байгуулж өгсөн тохиолдолд гэрээг хийх боломжтой” байгаа талаар мэдэгдсэн болно.

6 сарын өмнө