Хувийн тэтгэврийн тухай хуулийн төсөлтэй холбоотой асуудлаар НХХЯ-нд ажиллалаа

2020 оны 7 сарын 302020-07-30
Хувийн тэтгэврийн тухай хуулийн төсөлтэй холбоотой асуудлаар НХХЯ-нд ажиллалаа

Хувийн тэтгэврийн тухай хуулийн төслийг Улсын Их Хурлын гишүүн Н.Учрал нарын гишүүд  энэ оны хавар /2020.05.13/ УИХ-ын дарга Г.Занданшатарт өргөн барьсан.  Уг хуулийн төслийг энэ удаагийн Парламент хэлэлцэн батлах учиртай. Өнөөдөр /2020.07.30/ УИХ-ын гишүүн Н.Учрал, Л.Мөнхбаатар, Б.Саранчимэг нар Хувийн тэтгэврийн тухай хуулийн төслийн талаар Хөдөлмөр, нийгмийн хамгааллын сайд А.Ариунзаяа болон холбогдох албаны хүмүүстэй уулзаж, санал солилцлоо.

 

ХНХ-ын яамны Төрийн нарийн бичгийн дарга Г.Өнөрбаяр нийгмийн даатгалын тогтолцоо, тулгамдаж буй асуудал, статистик тоон мэдээлэл зэргийг УИХ-ын гишүүдэд танилцууллаа. Танилцуулгад УИХ-ын гишүүдийн өргөн барьсан Хувийн тэтгэврийн тухай хуулийн төсөл болон яамны зүгээс боловсруулсан Нийгмийн даатгалын багц хуулийн төслийн ижил болон ялгаатай талуудын харьцуулсан судалгаа багтсан байв.

 

УИХ-ын даргын захирамжаар байгуулагдсан Тэтгэврийн шинэчлэлийг хэрэгжүүлэх ажлын хэсэг өнгөрсөн хугацаанд санаачилгатай ажиллаж, нийгмийн даатгалын тогтолцооны өнөөгийн нөхцөл байдалд бодит дүн шинжилгээ хийж, гарц гаргалгааг гарган, хуулийн төслийг өргөн барьсан гэдгийг УИХ-ын гишүүн Н.Учрал онцоллоо. Тэрбээр Хувийн тэтгэврийн тухай хуулийн төсөл тэтгэврийн реформын эхлэл болж, цаашид Засгийн газраас нийгмийн даатгалын багц хуулийн төслийг өргөн барьж, УИХ хэлэлцэн баталснаар уг салбарт цогц шинэчлэл хийгдэж, дэвшил гарна гэдэгт найдаж байна гэлээ.

УИХ-ын гишүүн Л.Мөнхбаатар Үндсэн хуулийн нэмэлт, өөрчлөлтийн дагуу Үндэсний баялгийн сангийн тухай хууль өөрчлөгдөх ёстой. Энэ хуультай тэтгэврийн шинэчлэлийн асуудлыг уялдуулж, оновчтой шийдэх нь чухал гэдгийг тэмдэглэлээ. УИХ-ын гишүүн Б.Саранчимэг тэтгэврийн шинэчлэлийг зөв хийхийн тулд УИХ, Яам нягт хамтран ажиллаж, нэгдмэл байр сууриар асуудалд хандах, иргэд, судлаачид, эрдэмтдийн санал бодол, гаднын туршлагыг сайтар судлах нь зөв гэдгийг хэллээ.

 

Нийгмийн даатгалын тогтолцоонд шинэчлэл хийхдээ хуваарилалтын тогтолцооноос хуримтлалын тогтолцоонд шилжих зарчмыг баримтлах нь зүйтэй гэдэгт УИХ-ын гишүүд болон Хөдөлмөр, нийгмийн хамгааллын салбарынхан санал нэгтэй байгаа бөгөөд үүний төлөө нэгдэн ажиллахаа илэрхийллээ. УИХ-ын намрын ээлжит чуулганы хугацаанд Нийгмийн даатгалын багц хуулиуд болон Хувийн тэтгэврийн тухай хуулийн төслүүдийг хэлэлцэх юм хэмээн УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Санал болгох

Ч.Хүрэлбаатар ₮3.8 их наядын алдагдалтай төсвийн тодотголын төслийг өргөн барьжээ

Засгийн газрын санхүүгийн нэгтгэсэн тайланд дурдсанаар нийт 67.2 их наяд төгрөгийн хөрөнгө, 33.2 их наяд төгрөгийн өр төлбөр байна

21 минутын өмнө
ЗГХЭГ-ын дарга Л.Оюун-Эрдэнэ Засгийн газрын 2020-2024 оны үйл ажиллагааны хөтөлбөрийн төслийг өргөн барилаа

Монгол Улсын сайд, Засгийн газрын Хэрэг эрхлэх газрын дарга Л.Оюун-Эрдэнэ өнөөдөр (2020.08.14) “Монгол Улсын Засгийн газрын 2020-2024 оны үйл ажиллагааны хөтөлбөр батлах тухай”  болон “Монгол Улсыг 2021-2025 онд хөгжүүлэх таван жилийн үндсэн чиглэлийг батлах тухай” Улсын Их Хурлын тогтоолын төслүүдийг Улсын Их Хурлын дарга Г.Занданшатарт өргөн мэдүүллээ.

1 цагийн өмнө
Хятад иргэнтэй гэр бүл болсон монгол иргэд тус улс руу буцах хүсэлтээ ГХЯ-д гаргажээ

БНХАУ-д зорчих хүсэлт гаргасан Монгол Улсын 170 гаруй иргэний хүсэлтийг Гадаад харилцааны яам хүлээн авчээ.

7 цагийн өмнө
Саудын Арабаас зургаан иргэнээ авчрахад дэмжлэг хүслээ

Гадаад харилцааны сайд Н.Энхтайван эх орондоо ирэх хүсэлт гаргасан Саудын Араб-д байгаа зургаан монгол хүнийг авчрахад шаардлагатай тусламж дэмжлэг үзүүлэхийг хүсэв.

8 цагийн өмнө