Локарно ОУ-ын кино наадмаас Монголын гурван уран бүтээлч шагнуулжээ

2020 оны 8 сарын 142020-08-14
Локарно ОУ-ын кино наадмаас Монголын гурван уран бүтээлч шагнуулжээ

Швейцар Улсын Локарно хотноо 2020 оны 8 дугаар сарын 5-15-ны хооронд зохион байгуулагдаж буй 73 дахь удаагийн Локарно олон улсын кино наадамд Монгол Улсын кино уран бүтээлчид хоёр дахь жилдээ амжилттай оролцлоо. Тус хөтөлбөрийн “Open doors hub” буюу кино найруулагчдын бүтээлийг олон улсын хөрөнгө оруулагч нарт танилцуулж, санхүүжилт босгоход нь дэмжлэг үзүүлдэг хэсэгт найруулагч Пүрэв-Очирын Лхагвадулам, продюсер Цэрэнпилийн Ариунаа  нар “Ze” кино төслөөр, “Open doors lab” буюу жил бүр 8 кино продюсерийг шалгаруулж, тэдгээрт олон улсын киноны зах зээлийг илүү ойлгуулах, кино зохиол бичих, киноны мэргэжилтнүүдтэй  хэрхэн хамтран ажиллах талаар 6 өдрийн тусгай сургалт явуулдаг хэсэгт IFI продакшны продюсер Сайнбилэгийн Уран оролцов.

Энэ удаагийн “Нээлттэй хаалга” хөтөлбөрийн шагнал гардуулах ёслол нь 2020 оны 8 дугаар сарын 12-нд цахим хэлбэрээр явагдаж нийт 7 шагнал гардуулснаас Монголын уран бүтээлчид 3 шагналыг нь хүртэв. Найруулагч П.Лхагвадулам, продюсер Ц.Ариунаа  нарын “Ze” кино төсөл нь тус хөтөлбөрийн хамгийн нэр хүндтэй, тэргүүн шагнал болох “Нээлттэй хаалга” 40,000 шв.франкийн тэтгэлэгт шагналыг хүртэв. Найруулагч П.Лхагвадулам өөрийн кино төслөөрөө “Moulin d’Ande-Ceci” шагналыг хүртлээ. Продюсер С.Уран тус хөтөлбөрийн “Rotterdam Lab” шагналын эзэн болсноор 2021 онд Нидерландын Роттердам хотноо зохион байгуулагдах “Rotterdam Lab 2021” 5 өдрийн cеминарт оролцож, олон улсын мэргэжилтнүүдтэй туршлага солилцох эрхийг авав.

Тус наадмын нээлтэд Монгол Улсаас Швейцар Улсад суугаа Элчин сайд Л.Пүрэвсүрэн швейцарын талын урилгаар оролцож Локарно кино наадмын Ерөнхийлөгч Марко Солари болон “Нээлттэй хаалга” хөтөлбөрийн захирал Софи Бурдон нартай уулзаж, “Улаанбаатар” олон улсын кино наадмын үеэр Монголын уран бүтээлчдэд зориулсан кино зохиол бичих сургалтыг явуулахад дэмжлэг үзүүлэх, мөн “Нээлттэй хаалга” хөтөлбөрийн хүрээнд Монголын залуу кино уран бүтээлчдэд дэлхийн киноны зах зээлд гарахад зөвлөх үйлчилгээ үзүүлэх, төсөлд хамруулах асуудлыг ярилцаж тохиров.

Швейцарын Гадаад хэргийн яамны харьяа Швейцарын Хөгжлийн агентлаг “Нээлттэй хаалга” хөтөлбөрийг санхүүжүүлж, дэмжиж ажиллаж байгаа юм.

 

Санал болгох

“Дурсаж яваарай” киноны найруулагч Их Британийн кино наадмаас шагнал хүртлээ

"Дурсаж яваарай” киноны найруулагч Э.Ган-Очир шагнал хүртэв.

5 цагийн өмнө
“Хубилай хаан ба Монгол жанжид” үзэсгэлэнгийн нээлт боллоо

Чингис хаан түүний залгамжлагч алтан ургийн суут хаан Хубилай сэцэн хааны мэндэлсэний 805 жилийн ой энэ онд тохиож байна.

2 өдрийн өмнө
"Улаанбаатар фестиваль оркестр 2020" сонгодог урлагийн тоглолт болно

Монгол Улс дахь анхны баярын найрал хөгжим болох "UB Festival Orchestra"-ын эхний тоглолт 2020 оны есдүгээр сарын 27-ны өдөр 17:00 цагт Хүн театрт болно.

5 өдрийн өмнө
Monstar Production гар утсаар бүрэн хэмжээний дууны клип хийжээ

Энэрэл, Mrs M, FLA нар хамтран "Тансаг бүүвэй" нэртэй дууг дуулж, клипийг нь зургаан сарын турш хийсэн байна.

5 өдрийн өмнө