Нийслэлд бүртгэлтэй авто тээврийн хэрэгслүүдийг хөдөлгүүрийн төрлөөр ангилбал бензин хөдөлгүүртэй 407712, дизель хөдөлгүүртэй 129858, цахилгаан хөдөлгүүр бүхий 306, хийн хөдөлгүүр бүхий 13641 тээврийн хэрэгсэл байна.
Дээрх тоо баримтаас харахад цахилгаан хөдөлгүүртэй машин хамгийн бага буюу 306 байгаа юм. 2017 онд нийт 74 бүрэн цахилгаан хөдөлгүүртэй авто тээврийн хэрэгсэл бүртгэлтэй байсантай харилцуулбал энэ нь эерэг үзүүлэлт ч хүмүүс цахилгаан машины ач тусыг төдийлөн сайн мэддэггүй бололтой.
Уг нь цахилгаан хөдөлгүүртэй машин нь агаарын бохирдлыг бууруулахаас гадна, эдийн засгийн хэмнэлтийг бий болгох давуу талтай юм.
Цахилгаан машины хэрэглээг нэмэгдүүлэх зорилгоор Нийслэлийн Засаг дарга бөгөөд Улаанбаатар хотын Захирагч асан С.Батболд 2017 оны А/613 дугаар захирамжийн дагуу цахилгаан тэжээлт автомашиныг 2017 оны есдүгээр сарын 1-ний өдрөөс эхлэн замын хөдөлгөөнд дугаарын хязгаарлалтгүй оролцуулж эхэлсэн.
Мөн 2017 оны А/614 дүгээр захирамжийн дагуу цахилгаан тэжээлт автомашиныг авто зам ашигласны төлбөрөөс 2017 оны есдүгээр сарын 1-ний өдрөөс эхлэн чөлөөлсөн билээ. Одоо ч энэ захирамж хэрэгжиж байгаа юм.
