Гарт баригдаж, нүдэнд харагддаг СЭТГЭЛ

2020 оны 3 сарын 262020-03-26
Гарт баригдаж, нүдэнд харагддаг СЭТГЭЛ


“Энэ манай гэр гэж үү. Ямар гоё юм бэ. За одоо хичээлээ хийнээ” гэх хүүхдийн үг сонсогдлоо. Энэ үгийг сонсмогцоо би эргэн тойрноо харав. Энэ сууц,  хувцасны өлгүүр, шүүгээ, ширээ, номын тавиур гээд нүдэнд харагдах бүхий л эд юмс хүмүүсийн сэтгэл болохыг танилаа. Сэтгэл гээч гарт баригдаж, нүдэнд харагддагийг уншигч та ч бас анзаараагүй явсан байж магад. Хэдхэн хоногийн өмнө гэр хороолол дахь байшиндаа ээжийгээ асарч, хүүхдийн мөнгө, халамжийн тэтгэмжээр амьдралаа авч явдаг байсан 4-12 насны гурван хүүхэд, ээж Ц.Наранцэцэгийн хамт шинэ байранд нүүж ирээд буй нь энэ. 

Наранцэцэг эгчийн хувьд 2012 онд согтуу жолоочийн буруутай үйлдлээс болж автомашины осолд орж, эмчилгээ хийлгэсэн байна. Гэтэл 2016 онд амьдралын түшиг тулгууүр болсон ханиа авто машины ослоор алджээ. Гурван хүүхдээ тэжээхийн тулд барилга дээр ажиллаж, хүнд зүйл өргөсөн нь ослын үеийн гэмтэлийг нь сэдрээж, суумгай болжээ. Ингэж л хорвоогийн хатуу бэрхийн өмнө гурван хүүхэдтэйгээ хоцорсон аж. Хүүхдүүд нь усанд явж, түлээгээ хагалж, ээжийгээ асарсаар хэдийнэ гурван жил өнгөрчээ. Тэд одоо усанд явж, түлээ хагалахгүй боллоо. Учир нь тэдэнд туслах хандивын аяныг NTV телевиз зохион байгуулж хоёр өрөө байртай болголоо. 

Уг байрыг “Алтан Дорнод Монгол” компанийн захирал Т.Ганболд авч өгсөн бол бүх тавилгыг дотоодын “Мөнгөн тавилга ХХК” хийж өгчээ. Мөн хандивын аянд NTV телевизийн сэтгүүлч О.Болор-эрдэнэ, дөрвөн хүүхдийн аав Т.Төгс-эрдэнэ, дуучин Э.Энх-эрдэнэ, Ц.Наранцэцэгийн найз Баярмаа гээд сайхан сэтгэлтэй олон зуун хүн, албан байгууллага нэгдэж, тусалсан байна. 

Ц.Наранцэцэг: Одоо л нэг бүтэн нойртой хонох нь

90864100_1361661897377972_7279183639244439552_n.jpg

Ц.Наранцэцэг эгч Улсын хоёрдугаар эмнэлэгт хэвтэн эмчлүүлж, хагалгаанд орсон юм. Тэрбээр шинэ байранд орсон сэтгэгдлээ хуваалцахдаа “Ийм сайхан тохилог байранд орж байгаадаа баяртай байна. Шөнө охидоо гар чийдэн бариад гарахад нь сэтгэл зовоод хэвтэхээс өөр тусгүй байлаа. Гал хүчтэй асаж байна, угаартчихвий гээд үүр цайтал унтахгүй үе ч бидэнд байлаа. Ийм сайхан байранд орчихно гэж зүүдэлсэнгүй.  Одоо л нэг бүтэн нойртой хонох нь. Зовлонг минь бага ч болов нимгэлж өгсөн монголын ард түмэндээ баярлалаа. Өөрөө босоод галаа түлэх юмсан... Өөрөө хоолоо хийх юмсан гэж ч хааяа бодно. Одоо ийм сайхан орчинд хүүхдүүд маань амьдарч чаднаа. Одоо л надад итгэл төрж байна” гэсэн юм. Өрөөлөөс зовлон гуниг, баяр жаргалаа хэчнээн нуух гэж хичээсэн ч нүд нь хэдийнэ бүгдийг хүүрнэчихдэг үе бий. Ц.Наранцэцэг эгч болоод бяцхан үрсийнх нь нүднээс баярын сувд олж харах сайхан байлаа. 

О.Болор-эрдэнэ: Хүүхдүүдэд нь 8 сая төгрөгний хадгаламжийн данс нээлгэсэн

90766434_669993663829388_7543882722805022720_n.jpg

Харин энэхүү аяныг санаачлан зохион байгуулсан NTV телевизийн сэтгүүлч О.Болор-Эрдэнэ “Анх Баянзүрх дүүргийн онцгой байдлын хэлтсээс надтай холбогдсон. Тэд хэлэхдээ, “Бид галын хяналт шалгалтаар очиход бага насны гурван хүүхэд гал түлж байсан. Ээж нь хэвтэрт, бага насны гурван хүүхэд нь амьдралаа авч явдаг юм байна лээ. Бид анхааруулга өгчихөөд буцсан. Дараа нь бид дахин гэрт нь очиж зуухных нь аюулгүй байдлыг хангаж, гурван сарын хүнсийг нь авч өгсөн” гэж хэлсэн. Тухайн үед тус айл угаар мэдрэгчгүй, яндан, зуух нь эвдэрхий байсан учраас угаартах эрсдэл өндөр байсан. Бид онцгой байдлын хэлтсийн ажилчидтай хамт очиж охидтой ярилцах үеэр хүүхдийн мөнгө болон халамжийн мөнгөөрөө амьдардгаа хэлсэн юм. Том охин долоо хоногт нэг удаа Нарантуул зах явж хүнсээ цуглуулдаг. Хүнд зүйл өргөхөөр болвол дүүтэйгээ хамт явдаг. Шөнө босч галаа түлдэг гэж ярьж байсан. Хамгийн их сэтгэл хөдөлгөсөн зүйл нь энэ хүнд нөхцөлд амьдардаг ч охид онц сурдаг гэж хэлж байсан. Тиймээс бид хүүхдүүд амьдарлаа авч явдаг юм байна гэдэг мэдээллийг хүмүүст хүргэсэн. Мэдээлэл гарсны дараа олон хүн холбогдсон учраас хандивын аяныг зохион байгуулсан. 

20 сая 300 мянга  төгрөгний хандив цугласан. Ц.Наранцэцэг эгчийг хувийн эмнэлэгт үзүүлж,  шаардлагатай оношилгоо хийлгэхэд 2 сая 100 мянган төгрөг зарцуулагдсан. Харин байрны тохижуулалтад 9 сая төгрөг зарцуулагдсан.  Цахилгаан барааг бүгдийг нь шинээр авсан байгаа. Охидуудад зориулж ханыг нь гүнжийн зурагтай болгосон. Мөн нойлын өрөө босоо шүршүүртэй байсан. Ц.Наранцэцэг эгч усанд орж чадахгүй учраас ванн болгосон. Үлдсэн 8 сая төгрөгийг хүүхдүүдэд нь хадгаламжийн данс нээлгээд гурав хувааж хийсэн” гэсэн юм. 

Т.Ганболд: Тусалъя гэсэн эрмэлзэл маань эцэстээ байр болж хувирсан

 

90913640_2671297396436518_1778606000916398080_n.jpg

Охиноо шинэ байранд орж буйг мэдсэн Ц.Наранцэцэг эгчийн ээж “Алтан Дорнод” компанийн захирал Т.Ганболдод сэтгэлийн үгээ хэлнэ хэмээн утсаар ярьж байлаа. Тэдний хооронд чухам ямар яриа өрнөснийг бид мэдэхгүй ч “баярлалаа...талархлаа..” гэсэн үг лав байсан биз ээ.

Тэрбээр “Би иргэн Ганболд гэдэг хүнийхээ өмнөөс боломжгүй нэгэндээ чадахаараа тусалъя л гэж бодсон. Ээж болон хүүхдүүдийн тухай мэдээллийг анх битүүний өдөр уншсан. Их эмзэглэсэн дээ. Тэгээд сар бүр 1 сая төгрөгийн дэмжлэг үзүүлье гэж бодсон. Удалгүй зохион байгуулагч залуустай уулзаж, санал бодлоо солилцсон юм. Бид дулаан орон байртай болгох хэрэгтэй гэсэн шийдвэрт хүрээд байр авч өгөхөөр болсон. Тусалъя гэсэн эрмэлзэл маань л эцэстээ байр болж хувирсан” гэсэн юм.

Ай хүмүүний сэтгэлийг тэмтэрч үзээд л илч дулааныг нь гайхсан сайхан өдөр байлаа өчигдөр.

Санал болгох

Зэвсэгт хүчний тухай хуульд нэмэлт, өөрчлөлт оруулах төслийг өргөн барив

Монгол Улсын Их Хурлын дарга Г.Занданшатарт өнөөдөр (2020.04.01) Зэвсэгт хүчний тухай хуульд нэмэлт, өөрчлөлт оруулах тухай хуулийн төслийг Улсын Их Хурлын гишүүн, Засгийн газрын гишүүн, Батлан хамгаалахын сайд Н.Энхболд өргөн барив. 

29 минутын өмнө
“SmartUb” аппликейшнийг ашиглан иргэдээс цахимаар авах санал асуулгыг 20 хоногоор сунгалаа

Нийслэлийн Засаг даргын Тамгын газраас ирэх 2021 онд орон нутгийн хөгжлийн сангийн хөрөнгөөр хийгдэх ажлын талаарх цахим санал асуулгыг “SmartUb” аппликейшнийг ашиглан нийслэлийн есөн дүүргийн 173 хороонд гуравдугаар сарын 2-ны өдрөөс авч эхэлсэн бөгөөд цаг үеийн нөхцөл байдалтай уялдуулан цахимаар  санал авах хугацааг дөрөвдүгээр сарын 20-ны өдрийг хүртэл сунгажээ.

2 цагийн өмнө
БНСУ-д  байнга оршин суух эрхтэй иргэдийг тусгай нислэгээр илгээнэ

Сөүлээс  251, Токиогоос  255 иргэнийг  бүртгэж бүртгэл нь  баталгаажсан байна. Монгол Улсаас Сөүл, Токио руу явах гэж буй иргэдэд шинэ мэдээлэл өгөх шаардлагатай боллоо.  БНСУ-ын засгийн газар дэлхийн бүх улсаас ирж буй гадаад, дотоодын  иргэдийг 14 хоног тусгаарлах горимд шилжлээ. Үүнтэй холбоотойгоор зөвхөн зайлшгүй шаардлагатай ажлаар БНСУ-д зорчих, байнга оршин суух эрхтэй буюу гурван сараас дээш хугацааны визтэй иргэдийг энэ нислэгүүдээр хүлээн авах боломжтойг Солонгосын талаас мэдэгдсэн. 

3 цагийн өмнө
Гаалийн байгуууллага гуравдугаар сард 93 сая  төгрөгийн татварыг нөхөн төлүүлсэн байна

Гаалийн байгууллага 2020 оны  гуравдугаар сард   нийт 77  зөрчил илрүүлсэн байна. Үүнээс хялбаршуулсан журмаар шийдвэрлэсэн 76  зөрчил, зөрчлийн хэрэг бүртгэлт хийсэн нэг байна.  Дээрх зөрчлүүдэд нийт 63.07  сая төгрөгийн торгууль ногдуулж, 93.45 сая  төгрөгийн татварыг нөхөн төлүүлсэн байна. Зөрчлийн улмаас улсын орлого болж хураагдсан бараа эд зүйлийн үнэ 3.7 сая төгрөг, харин эрүүгийн шинжтэй хэргийн улмаас түр хураасан алт  металл нь  37.8 сая   төгрөг болсон  байна.  

4 цагийн өмнө