Сурагчдынхаа даалгаврыг бүтээлчээр бэлтгэн гэрт нь хүргэж өгч байна

2021 оны 12 сарын 282021-12-28
Сурагчдынхаа даалгаврыг бүтээлчээр бэлтгэн гэрт нь хүргэж өгч байна

Цар тахлын үед халдвар хамгааллын дэглэмээ баримтлан, сурагч бүрийнхээ гэрийн гадаа очиж утас цохин алхаж яваа энэ бүсгүй бол Монгол 3-р сургуулийн бага ангийн багш Г.Заяажаргал.

Г.Заяажаргал сурагчиддаа зориулж улирлын амралтынх нь даалгаврыг  бүтээлчээр бие даан бэлджээ. Бас хүүхэд бүрт чин сэтгэлийн үгтэй мэндчилгээ бичиж, амттан нэмсэн байна. Мэндчилгээний ард хүүхдүүдийн улирлын дүнг бичжээ.
Тэрээр 6 дахь жилдээ багшилж байгаа залуу багш юм. Энэ жил 4-р ангитай. Түүний анги 47 сурагчтай.  Цар тахлын үед хоёр жил зайнаас хичээллэсэн сурагчид 9-р сараас танхимаар хичээллэж, хичээлийн хоцрогдлыг нь бага багаар арилгажээ. Гэвч дахин урт хугацаагаар амарч байгаа учраас хичээлийн хоцрогдол үүсэх вий гэж санаа зовсондоо тэрээр эцэг эх нь ажил ихтэй, даалгавраа авч чадахгүй байгаа хүүхдүүдэд даалгаврыг нь бяцхан бэлэгтэй нь өөрийн биеэр хүргэж өгч байгаа нь энэ юм. Тэрээр хичээл хийхдээ хүүхдийг залхахгүй байгаасай гэсэндээ даалгаврыг сонирхол татах байдлаар, бүтээлчээр хийлгэхийг хичээдэг.
269828144_1080508329455193_5553071754296533013_n.jpg
Өнгөрсөн жил хөл хориотой үед оройн 10 цагийг хүлээж байгаад нөхөртэйгөө нууцаар шахуу явж бэлтгэсэн даалгавраа бяцхан бэлэгтэйгээ өгч байснаа шоолонгуй ярилаа. Энэ удаагийн улирлын амралтаар хүүхдүүдэд их даалгавар өгөхгүй байх чиглэл өгсний дагуу уншсан ном, өгүүллийн ердөө он сар, гол баатрыг бичиж, гол санааг зургаар зурж илэрхийлэх зааварчилгаатай номыг хийж, өөрийн принтер дээрээ хэвлэж, нэг бүрчлэн үджээ. Эцэг эх нь завгүй даалгавраа авч чадахгүй байгаа хүүхдүүд дээр очиход сурагчид нь бөөн баяр болж угтаж байлаа.
269932446_1071355253627596_241184255074354865_n.png
Сурагчдаа даалгаврыг нь өгч буй нь

Монгол 3 дугаар сургуулийн 4а ангийн сурагч А.Цэлмүүн: Багш амралт бүрээр бидэнд сонирхолтой даалгавар өгдөг. Энэ удаа амттантай өгч байгаад үнэхээр их баярлаж байна.

 
269844142_467921411444764_7068167417706280061_n.png
Монгол 3 дугаар сургуулийн 4а ангийн сурагч Б.Урангоо: Маш их баяртай байна. Амралт эхлээд гэртээ уйдаж байгаа. Одоо багшийнхаа өгсөн даалгаврыг хийгээд амралтаа үр дүнтэй өнгөрүүлнэ.     
 

Монгол 3 дугаар сургуулийн бага ангийн багш Г.Заяажаргал: Хүүхэд бүр харилцан адилгүй суралцдаг. Зарим нь бие дааж даалгавраа хийдэг бол зарим нь эцэг эхийнхээ тусламжийг авдаг. Тийм учраас аав ээж нь ажилтай, завгүй үед даалгавраа хийж чадахгүй хичээлийн хоцрогдол үүсдэг. Тийм болохоор өөрөө бие даагаад хичээлээ хийх боломжтой байх үүднээс зурагтай, бүтээлч дасгалтай даалгавруудыг бэлтгэдэг. Энэ нь хүүхдүүдийг зохион байгуулалттай, сонирхолтой даалгаврыг нь хийх боломжийг олгодог.

 
Бага ангийн багш Г.Заяажаргалын бүтээлч байгаа, сэтгэлээсээ ажиллаж байгаа шалтгаан их энгийн. Бага ангийн багш болохыг хамгаас ихээр хүсч, багш мэргэжлийг сонгосон учраас хүүхдүүдийнхээ баярлахыг, аливааг сурч байгааг харах хамгийн сайхан байдаг гэсэн юм.
Тийм болохоор л "Яав л хүүхдүүдээ залхаахгүй сургах вэ?" гэсэн асуултыг өдөр бүр өөрөөсөө асуудаг байна. Түүний багш мэргэжил эзэмшсэн түүх ч сонирхолтой. Булган аймгаас 10 жилээ төгсөхөд бага ангийн багшийн ангид элсэх хуваарь ганцхан иржээ. Гэтэл тэр 5-р байранд жагссан. Багш болж чадахгүй нь хэмээн залбирсаар суутал эхний 4 хүүхэд татгалзаж Г.Заяажаргал бага ангийн багшийн хувиараа авч байхдаа баярлаад маш их уйлжээ. Элсэлтийн комиссынхон ч бага ангийн багш болохоор ийм их хүсч элссэн хүүхдийг харж байсангүй хэмээн баяр хүргэсэн түүхтэй. Сурагч байхдаа "Сурагчийн нэг өдөр"-өөр багш болоход бага насны хүүхдүүд ямар ч хар цагаан бодолгүй хамгийн сайхан ертөнц гэсэн мэдрэмж төрснөөр түүний амьдралын чухал сонголт хийгджээ. Хүсч, сонгож эзэмшсэн мэргэжил учраас хүүхдүүддээ хамгийн бүтээлчээр, үнэн сэтгэлээсээ ханддаг байна.
269830888_592174588551330_6986557978676837546_n.png

Санал болгох

"Актлах" автобусанд амьд явах баталгаа алга

Хамгийн аюултай нь, сүүлийн жилүүдэд үйлчилгээнд явж байсан автобус шатах болсон нь иргэд нийтийн тээврээр аюулгүй үйлчлүүлэх баталгаа байна уу гэдэг асуудлыг хөндөхөд хүргэж буй

1 сарын өмнө
Авлигачдыг алагчилъя

Авлигачдыг, хар тамхины наймаачдыг, хүчингийн хэрэгтнүүдийг, гадаадын тагнуулыг, террористыг өршөөлд хамруулдаггүй. Энэ бол гэмт хэрэгтэй тэмцэх төрийн бодлого. Гэмт хэрэгтэй тэмцэх чиг үүрэгтэй Засгийн газар ийм бодлого барьж төслөө боловсруулаад, хууль тогтоох дээд байгууллага УИХ нь баталж байна. Нэгэнт улс нийтээрээ авлигатай тэмцэе гэж байгаа бол зөвхөн зардал, цаг хугацаа хэмнэх зорилгоор авлигачдын толгойг илж тэдэнд хялбаршуулсан журмаар хэргээ шийдүүлэх боломж олгодог байдлыг халах шаардлагатай. Улсын хэмжээнд шүүхээр шийдвэрлэгддэг нийт хэргийн 0.5 хувь нь авлигынх.

1 сарын өмнө
Хуульчдын форум: Цэц ичих хэрэгтэй

Монголын Хуульчдын холбоо их хурлаа 12 сарын 10-нд товложээ. Үүнээс наана өнөөдөр “Хуульчдын форум”-аа Улаанбаатар зочид буудалд зохион байгууллаа. Зохион байгуулагчийн тоолсноор 130 мянган төгрөгөө төлсөн 290, зохион байгуулагчтайгаа нийлээд 320 хуульч оролцсон юм байна. Сурвалжлагчийн хувиар форумд оролцож, тайзан дээр уригдсан, зааланд суусан шүүгч, прокурор, өмгөөлөгч, судлаачидтай ярилцаж үзэв. Хуульч биш, хөндлөнгийн хүн учраас ерөнхий уур амьсгал, давтамжтай өгч байсан мессеж, илтгэлээс базсан ажиглалтаа хуваалцах нь зөв биз ээ. Энэ форум хуульчдынх, тэрийг дагаад зүйл, заалт уйтгартайн дээр, дараа нь “хүний хэлээр” зажилж бичиж болох тул энэ удаад үлдээе гэж бодлоо.

1 сарын өмнө
Хоцрогдсон стандартаар хоцрогдсон байдлыг хамгаалж байна

Шадар сайд С.Амарсайханы танилцуулснаар Монгол Улсад 6525 стандарт байна. Гэтэл аль салбарт, төрийн болон бизнесийн үйлчилгээ, бараа бүтээгдэхүүнд ямар стандарт мөрдөгддөг болохыг Стандарт, хэмжил зүйн бие даасан агентлаг иргэдэд сурталчилж, ойлгуулаагүй явж ирсэн. Иргэд тэрхүү “стандарт” гэгчийг мэдэхгүй учраас бид өнөөдөр идэх хүнс, хэрэглэх бараа, авах үйлчилгээ, эдлэх хөрөнгө, байх орчин, явах зам чанарын наад захын ямар шаардлага хангасан байх ёстойг төдийлөн мэдэхгүй. Мэдэхгүй учраас хэнээс юу шаардахаа мэддэггүй, ердөө л “сэтгэл гаргасан, гаргаагүй” гэх тодорхойгүй хэмжүүрээр тэдгээрийг үнэлж иржээ.

2 сарын өмнө