Нийслэлийн Баянгол дүүргийн 18-р хорооны нутаг дэвсгэрт байрлах байрны долоон давхарын лифтний хонгилоор бага насны хүүхэд унаж нас барсан хэрэгтэй холбогдуулан "Улаанбаатар лифт" ОНӨААТҮГ-аас мэдээлэл хийлээ.
“Улаанбаатар лифт” ОНӨААТҮГ-ын дарга Д.Ган-Эрдэнэ: Манай байгууллагын үндсэн чиглэл нь нийслэлийн болон улсын төсвийн хөрөнгө оруулалтаар хийгдэж байгаа цахилгаан шатанд хяналт тавьж, гэрээт ААН, СӨХ-ны цахилгаан шатны засвар үйлчилгээг хийн ажилладаг. Өнөөдрийн байдлаар 160 ААН-ийн 70 цахилгаан шатанд засвар үйлчилгээ тавьдаг. Зөвхөн гэрээт СӨХ-ны цахилгаан шатыг засварлаж, хяналт тавьдаг. Заавал мэргэжлийн лифтчин байх ёстой, сар бүр техник үзлэг хийлгэх хэрэгтэй байдаг. Ингэснээр эрсдэл гарахгүй. Осол гарсан байрны СӨХ-той гэрээгүй ба хоёр жилийн өмнөөс л яригдаж байсан. Нийслэлд 7 мянга гаруй лифт байдаг. НМХГ, барилга хот байгуулалтын яам гээд эрх бүхий байгууллага дүгнэлт үйлдэн хяналт тавин ажилладаг. Нийтийн орон сууцны дундын өмчлөлийн тухай хуульд тухайн цахилгаан шатыг ашиглагч байгууллага эвдрэл гэмтлийг хариуцах ёстой байдаг. Тиймээс ийм тохиолдолд СӨХ-ны буруу гэсэн үг.
