Америкийн сагсан бөмбөгийн ертөнцөд өөрийн гэсэн өнгө төрх, арга барилыг шингээж үлдээсэн Коби Брайнт хоёр жилийн өмнөх нэгдүгээр сарын 26-нд өөрийн охин Жианнатай хамт нисдэг тэргээр явж байхдаа осолдон амиа алдсан билээ. Тэд Коби Брайнтын Мамба спортын академид зохиогдох сагсан бөмбөгийн тэмцээнд явж байгаад осолдсон юм. Тухайн үед Коби Брайнт 41 настай охин Жианна нь 13 настай байлаа. Тэгвэл уран барималч Дан Медина Коби Брайнтыг охин Жианнатайгаа алхаж яваа хөшөөг хийж осол болсон Калабасас ууланд 12 цагийн хугацаатай байршуулжээ.
Хөшөөг Коби Брайнт охинтойгоо ярин инээж байгаагаар дүрсэлсэн байна. Харанхуй болмогц хөшөөг буулган өөр газарт шилжүүлэх юм. Коби Брайнтын фэн уран барималч Дан Медина “Баатрууд ирдэг бас явдаг. Гэхдээ домгууд үүрд үлддэг” гэжээ. Коби болон түүний охинтой хамт нисдэг тэргэнд сууж явсан долоон хүн амь үрэгдсэн юм. Сонирхолтой нь түүний бүхий л замналынхаа турш тоглосон Лос Анжелес Лейкерс баг өнөөдрийн байдлаар NBA-д 24 хожил 24 хожигдолтой явж байна. 24 бол Коби Брайнтын мэргэжлийн сагсан бөмбөгт тоглохдоо зүүдэг байсан дугаар юм.
