Хөгжлийн банкны чанаргүй зээлийн талаарх "Өөрөөр нь төлүүлье" хэлэлцүүлэг болж байна.
Энэ үеэр Хөгжлийн банкыг шалгах ажлын хэсгийн ахлагчаар ажиллаж байсан Л.Энх-Амгалан мэдээлэл өглөө.
Тэрээр "Хөгжлийн банкыг тойрсон асуудал өнгөрсөн сарынх биш. Энэ банкыг анх 2012 онд байгуулсан цагаас эхлэлтэй. 2012 онд анхны 500 сая ам долларын бонд босгож эхэлж байсан.
Миний бие тухайн үед УИХ-аас шалгалт оруулах ажлын хэсгийн ахлагчаар ажиллахаар болсон. Ингээд шалгалт оруулахад, нэгдүгээрт Самура бондын 1 тэрбум долларын санхүүжилт дутуу орж ирсэн. Дутуу орж ирэхдээ 55.7 сая долларын суутгуулсан дутуу дүн орж ирсэн. Хоёрдугаарт, ЗГ-ын тогтоолгүй санхүүжилт олгосон зөрчил маш их байсан. Яг өнөөдрийн зээлүүд. Эдгээр зээлүүд Монгол банкны мэдээллийн санд огт бүртгэгдээгүй байсан. Гуравдугаарт нь 1.5 тэрбум долларыг арилжааны хоёр банканд байршуулсан байдаг. Тодруулбал, Худалдаа хөгжлийн банк, Улаанбаатар хотын банк байна. Ингэхдээ хадгаламжийн хүү нь бусад банкнуудаас 2-3 функтээр бага байршуулсан байсан. Зарим зээлдэгчийг ямар ч сонгон шалгаруулалтгүй өгч, шууд гэрээ байгуулсан зөрчил үүссэн зэрэг дүгнэлт гарсан.
Энэ тайлангаа Эдийн засгийн байнгын хороо, Төсвийн байнгын хороонд танилцуулж чадаагүй. Учир нь энэ дүгнэлтэд ажлын хэсэгт орж ажилласан Уянга болон МАН-ын гишүүдээс бусад нь гарын үсэг зураагүй. Тиймээс ирц хүрээгүйгээс байнгын хороодод санал орж чадаагүй. Гэхдээ тухайн үед цөөнх байсан МАН-ын 26 гишүүн АТГ-д хандсан. Харамсалтай нь хууль хяналтынхан шалгасан эсэхэд хариулт өгөөгүй. Ингээд 2016 онд манай нам олонх болж Эрдэнэбатын Засгийн газарт дахин энэ саналаа хүргүүлсэн. Тухайн үед энэ санал дүгнэлтийг авч хэрэгжүүлсэн бол өнөөдрийн ийм нөхцөл үүсэхгүй байсан" гэв.
