Ардчилсан намын ҮБХ өнгөрсөн долоо хоног ээлжит бусаар хуралдаж, 152 хүний саналаар Л.Гантөмөрийг сонгосон билээ. Тэгвэл өнөөдөр АН-ын даргаар сонгогдсон Л.Гантөмөрийн нэрийг УДШ-д бүртгүүлэхээр өргөн барив.
Энэ үеэр АН-ын Ерөнхий нарийн бичгийн дарга Ч.Өнөрбаяр "Хэн нэгэн хүн өөрийгөө дарга гээд хуулийн дээгүүр алхдаг байж таарахгүй. Хэн ч байсан хуульд захирагдах ёстой. Бид дотроо ойлголцсон. УИХ дахь АН-ын бүлэг Монголын төрд дэх АН-ын төлөөлөл. Үндэсний бодлогын хороо нам талаасаа эрх бүхий байгууллага. Уг хоёр байгууллага ойлголцоод эвлэрэл дээр нэгдэж намын шинэ даргаа сонгосон. Шинээр сонгогдсон Л.Гантөмөр даргыг УДШ-д бүртгүүлэхээр материалаа бүрдүүлээд ирлээ. Шүүх хараат бусаар ажиллаж хуулийг дээдэлж АН-ын асуудлыг зарчмын дагуу шийднэ гэдэгт итгэж байна" гэв.
Харин УИХ дахь АН-ын бүлгийн дарга О.Цогтгэрэл "Нэгдүгээр сарын 19-нд АН-ын ҮБХ хуралдсан. Хурлаас АН-ын шинэ даргыг ёсчлон баталсан. Ажлын хэсэгт Үндэсний бодлогын хорооны гишүүд шинээр ёсчлон баталсан намын даргыг Улсын дээд шүүхэд бүртгүүлэх ёстой гэж заасан тул энэ дагуу холбогдох бичиг баримтыг бүртгүүлэхээр ирлээ. Ардчилсан намын 300 гаруй гишүүн асуудлыг шийдэх гэж оролцсон. Тэгэхээр энэ бол хууль ёсны дагуу шийдвэр. Харин асуудлыг шийдье гэхэд цаг хожиж бусниулж аливаа асуудалд С.Эрдэнэ даргын талаас ханддаг" гэлээ.
Э.БУРАМ
