УИХ-ын хаврын ээлжит чуулганы үеэр хэлэлцэх асуудлын эхэнд УИХ-ын гишүүн Б.Пүрэвдорж Сангийн сайд Б.Жавхланд "сануулга" өглөө. Тэрбээр хүүхдийн мөнгийг бүх хүүхдэд тэгш ялгахгүй олгохыг сануулав. Энэ тухай хэлсэн үгэндээ "Хүүхдийг хашаатай, машинтай гэх шалтгаанаар хүүхдийн мөнгөнөөс хасаж болохгүй. Сангийн сайд анхаараарай"гэсэн юм. Энэ тухай дараах байр суурийг илэрхийлсэн билээ.
-УИХ-ын гишүүд чуулганы завсарлагаар тойрогтоо ажилласан. Ажиллах явцад хүүхдийн мөнгийг бүрэн олгож байна уу гэдэгт ахмадууд хэлж, шалгуулсан. Зөвхөн Ховд аймгаас гадна Сэлэнгэ, Дархан-Уул аймгийн иргэдтэй уулзсан. Хүүхдийн мөнгөний асуудлыг шийдсэн Сангийн сайдын сонгогдсон тойрог буюу Дархан Уул аймгийн Шарын гол суманд амьдардаг иргэн Бямбаа гуайн найман хүүхдийн зургаа нь хүүхдийн мөнгөнөөс хасагдсан байна. Яагаад гэхээр, аав нь Оюутолгойд ажилладаг, байртай, машинтай гэх шалтгаанаар хасчээ. Ерөнхийдөө судалгаанаас харахад хүүхдүүдийн 25 орчимд хүүхдийн мөнгө өгөхгүй байна. Хүүхдийн мөнгө өгөхгүй байх тохиолдол харагдаж байна. Барааны үнэ өссөн, эдийн засгийн нөхцөл байдал хүндэрсэн, дундаж давхарга байхгүй болж байна. Эдийн засгийн хямралаас гараагүй. 4.5 хувиар өссөн гэж та нар ярьж байгаа ч төгрөг 20 хувиар суларсан. Ам.долларт шилжүүлж тооцвол юу ч өсөөгүй. Хашаатай, машинтай гэх шалтгаанаар хүүхдийн мөнгөнөөс хасаж болохгүй. Сангийн сайд анхаараарай гэсэн юм.
Б.ЦЭЦЭГ
