Хотын даргын ажилд нийслэлийн оршин суугч хэнбугай ч “Онц муу” гэсэн дүнг эргэлзэх юмгүй тавихаар байгаа.
Монголчууд бөхдөө хайртай ч хотынхоо бөх даргад харин дүргүй болчихож. Ажлаа хийж чадахгүй бол аварга байгаад ч хайр хүлээдэггүй юм байна. Үүний тодоос тод жишээ нь Д.Сумъяабазарыг огцруулах санал санаачлага иргэдийн зүгээс үе үехэн гардаг, нийгмийн сүлжээгээр үзэл бодлоо илэрхийлдэг явдал. Гэвч оочин цоочин ийм илэрхийлэлүүд нэгдэн нийлж чадахгүй өдийг хүрэв. Сүүлийн хоногуудын үйл явдлаас харж байхад Нийслэлийн иргэдийн хурлын төлөөлөлүүд энэ асуудлыг ярьж эхлэв бололтой.
Тэр хотын дарга болоод уг нь бараг гурван жил болчихож. Гэвч нийслэлчүүд түүнд дасч идээшиж чадсангүй өдий хүрлээ. Иргэдээсээ, хотын ажил амьдралаас хол байсны хор гор нь энэ.
Амласнаа хэрэгжүүлдэггүй, ажлаа хийдэггүй, хэлсэн, хийсэн нь алд дэлэм зөрдөг хотын даргатайгаа 2024 оны сонгуультай золгох аваас МАН Нийслэлийн сонгогчдоос дэмжлэг авна гэж саналтгүй. Товчхондоо хотын даргынхаа хөлд чирэгдэж унахаар нөхцөл байдалтай тулгарч мэдэх юм. Харамсалтай нь эрх баригчид харсаар мэдсээр байгаа хэрнээ “Сүх далайтал үхэр амар” гэгчээр эрхлүүлж бөөцийлж, төсвийн мөнгөөр угжсан хэвээр.
Одоогийн хүчин төгөлдөр байгаа Сонгуулийн тухай хуулиар Улаанбаатар хот сонгуулийн 24 мандаттай хамгийн өргөн фронт. Намуудын ялалт ялагдал энд л дэнслэгддэг. Харамсалтай нь УИХ-ын гишүүнээсээ татгалзан байж хотын даргын суудалд заларсан Д.Сумъяабазарын урагшгүй байдлаас улбаалж нийслэлийн сонгогчид МАН-аас нүүр буруулаад эхэлчихсэн. Хэрэв түүнтэй хариуцлага тооцож чадахгүй бол сонгогчдоо бүрмөсөн үргээнэ гэсэн үг. Иргэдийн нэгэнт үргэсэн итгэл үнэмшил эргэж иртлээ удна шүү, эрх баригчид аа.
Нийслэлийн иргэд тэр аяараа Сумъяабазарыг огцруулахын төлөө байгаа нь эргэлзэх хэрэггүй үнэн бөгөөд тодоос тод зураглал. Тэр дуу хоолой сонсогдсоор л байгаа.
Уг нь ухамсар, боловсролтой нэгэн байсан бол нийгмийн ийм уур амьсгалыг хэдийнэ мэдэрч сайн дураараа огцорвол өөрт нь ч өлзийтэй, эрх баригч намд нь ч ээлтэй байхсан.
Д.Сумъяабазарын багийнхан 2020 оны сонгуульд “Утааг халав. Түгжээг тайлна” гэсэн уриа дуудлагатайгаар оролцсон. Харамсалтай нь энэ уриа урвуу хамаарлаар хэрэгжиж утааг ундруулж, түгжээндээ түгжигдээд байна.
Сонгогчид хариуцлагатай болсон. Амлалтаа биелүүлдэггүй дарга намаа хөлдөө чирэх нь бас нэг үнэн.
Улаанбаатар хот хэр ажил хэрэгч даргатай вэ гэдгийг алхаж яваа гудамж, амьдарч буй орчноосоо хэн ч гэсэн анзаарч чадна. Хог шороо, шивтэр шинхэг, хир буртаг, ундуй сундуй байдал, түгжрэл, иргэдийн бухимдал энэ бүхэн бэлээхэн тусгал нь.
Өндөр үнэтэй автобус, гудамж цэвэрлэгч машин, өнгөрсөн өвлийн утаа, өнөөдрийн түгжрэл, төсвөөс олгосон 400 гаруй тэрбум төгрөгийн бүрхэг тодорхойгүй зарцуулалт гээд түүнд хаягласан шүүмжлэл сануулга өдий төдийгөөрөө бэлээхэн байдаг болхоор тэр бүхнийг дурдсангүй.
Харин эрх баригчид 2024 оны сонгуульд Нийслэлд өөрсдийнхөө өвдөг шороодох нүхийг бөх даргаараа ухуулж байгаа гэдгээ л санаж сэрээсэй билээ.
