Дундговь аймагт гэр шатаж ахмад настан болон хүүхэд амь насаа алдсан харамсалтай хэрэг өчигдөр гарчээ. Онцгой байдлын ерөнхий газрын мэдээлснээр галын дуудлага энэ сарын 25-нд шилжих шөнийн 01:56 цагт аймгийн онцгой байдлын газарт бүртгэгдсэн байна. Энэ дагуу Эрдэнэдалай сум дахь гал унтраах аврах багийнхан очиход иргэн Б-ын таван ханатай гэр шатаж байсныг унтраажээ. Харамсалтай нь, 76 настай эрэгтэй Р болон найман настай Т нар өртөж нас барсан байсан тул талийгаачдын цогцсыг гаргаж цагдаагийн байгууллагад шилжүүлжээ.
Мөн тухайн өдөр нийслэлд Сонгинохайрхан дүүргийн 19 дүгээр хорооны 1 дүгээр гудамжинд иргэн Б-ийн 40х30 метрийн хэмжээтэй гал тогооны өрөөнд эд зүйл, агааржуулалтын хуванцар хоолой шатаж байсныг унтраасан. Утаажилтын бүсээс 32 иргэнийг гаргаж, 5 иргэн бага зэрэг угаартсан байсныг НТТТ-д шилжүүлэн өгсөн байна.
