Зүүн хойд Азийн хотын дарга нар хүн амын төвлөрлийг сааруулах асуудлыг хэлэлцлээ

2022 оны 12 сарын 92022-12-09
Зүүн хойд Азийн хотын дарга нар хүн амын төвлөрлийг сааруулах асуудлыг хэлэлцлээ

Зүүн хойд Азийн хотын дарга нарын тав дахь удаагийн форум “Томоохон хотуудын авто замын түгжрэлийг бууруулж, хүн амын төвлөрлийг сааруулах тогтвортой хөгжлийн стратеги: Шийдлүүд ба түүнийг санхүүжүүлэх боломжууд” сэдвийн дор болов.  

Монгол Улсын нийслэл Улаанбаатар хотын санаачилгаар 2014 оноос хойш тасралтгүй зохион байгуулсан тус форум нь сайн туршлага, шилдэг техник, технологийн ололтыг харилцан солилцох замаар хотуудын өмнө тулгамдаж байгаа нийтлэг хүндрэл бэрхшээлийг шийдвэрлэж, улмаар Зүүн хойд Азийн бүс нутгийн хамтын ажиллагааны олон талт механизм болон хөгжих зорилготой билээ.

Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэн “Түгжрэл, хүн амын төвлөрөл бусад хотын хувьд ч нийтлэг, тулгамдсан асуудал. Үүнийг хэрхэн богино хугацаанд, оновчтой шийдэх вэ гэдгийг бид өнөөдөр хэлэлцэж, туршлагаасаа хуваалцлаа. Амжилттай хэрэгжиж байгаа, үр дүнгээ өгсөн арга хэмжээ, оновчтой шийдлүүдээс суралцаж байгаа нь өнөөдрийн арга хэмжээний гол үр дүн” гэж онцоллоо.

Мөн “Автозамын түгжрэлгүй хотыг бий болгох чиглэлээр хотуудын баримталж буй бодлого, тулгарч буй бэрхшээлүүд” сэдвийн хүрээнд Монгол Улсын сайд, Нийслэл Улаанбаатар хотын авто замын түгжрэлийг бууруулах үндэсний хорооны дарга Ж.Сүхбаатар хотын авто замын түгжрэлийн өнөөгийн нөхцөл байдал, авч буй арга хэмжээний талаар илтгэл тавьсан юм.

Тэрбээр “Улаанбаатарт тулгамдаж буй авто замын түгжрэлийн асуудал бусад хотод ч бий. Энэ асуудлыг шийдсэн, шийдэж буй туршлагаасаа бусад оролцогч хуваалцлаа. Тухайлбал, Бээжин хотын хувьд энэ асуудалтай эрт нүүр тулж, шат дараатай арга хэмжээ авч, үр дүнг нь үзсэн байна. Манай хотын нөхцөл байдлыг харвал нэн тэргүүнд нийтийн тээврийг хүртээмжтэй, ая тухтай, таатай болгоход анхаарах нь чухал. Ингэхдээ зөвхөн парк шинэчлэл хийгээд зогсохгүй маршрутыг оновчтой болгох, нийтийн тээврийн жолооч нарын соёлыг дээшлүүлэх, үйлчилгээний стандартад анхаарах гээд олон арга хэмжээг авна” хэмээв.

Түүнчлэн  “Хүн амын төвлөрлийг сааруулах чиглэлээр хотуудын баримталж буй бодлого, тулгарч буй бэрхшээлүүд” сэдвийн хүрээнд Нийслэлийн Бодлогын судалгаа шинжилгээний төвийн дарга Р.Дагва илтгэл тавьсан.

Тэрбээр “Хүн амын төвлөрөл, үүнийг дагасан асуудал нийслэлд тулгамдаж байна. Хотжилт, эдийн засаг, нийгмийн хүчин зүйлүүдээс улбаалсан шилжилт хөдөлгөөн, төвлөрөл бусад хотод ч бий. Гэхдээ үүнийг бэрхшээл, асуудлын шалтгаан гэж харахгүй байх нь чухал. Бид энэ төвлөрлийг ухаалгаар зохицуулж, хотын эдийн засгийг тэлэх, цаашлаад нийгмийн асуудлуудыг шийдвэрлэх боломж гэж үзэх ёстой” гэв.

Уг форумд Монгол Улс, БНХАУ, ОХУ, БНСУ, Япон Улсын таван орны 23 хотын удирдлагууд, салбарын мэргэжилтнүүдээс гадна Монгол Улсад суугаа Элчин сайдын яам, олон улсын байгууллагын 90 гаруй төлөөлөгчид цахим болон танхимын хэлбэрээр оролцлоо.

НИЙСЛЭЛИЙН СУРГАЛТ, СУДАЛГАА, ОЛОН НИЙТТЭЙ ХАРИЛЦАХ ГАЗАР

Санал болгох

“Амар байна уу 2023” үзэсгэлэнд 1000 гаруй жижиг, дунд бизнес эрхлэгч түрээс төлөхгүй оролцож байна

Эдийн засгийн эргэлтийг эрчимжүүлэх, жижиг, дунд бизнес эрхлэгчдийг дэмжих зорилгоор Сар шинийн баярыг угтан зохион байгуулж буй “Амар байна уу 2023” өргөтгөсөн худалдаа “Шинэ 100 айл” төвд зургаа дахь өдрөө үргэлжилж байна

20 цагийн өмнө
Нийслэлийн хориглосон бүсээс 4557 толгой мал гаргалаа

Нийтийн эзэмшлийн зам талбай бохирдуулах, ногоон байгууламж сүйтгэх, зам тээврийн осол гаргах, халдварт, гоц халдварт өвчих тархах зэрэг эрсдэлээс сэргийлэн нийслэлийн ихэнх хэсэгт мал аж ахуй эрхлэхийг хориглодог

2 өдрийн өмнө
Шинээр ирсэн автобуснууд бүгд үйлчилгээнд гарлаа

Нийтийн тээврийн парк шинэчлэлийн хүрээнд он гарсаар 117 автобусыг оруулж ирсэн. Тэгвэл эдгээр автобусыг бүгдийг нь үйлчилгээнд гаргаад байна. Энэ талаар Нийслэлийн Нийтийн тээврийн газрын Тээвэр төлөвлөлтийн хэлтсийн дарга Б.Тамираас тодрууллаа.

3 өдрийн өмнө
Хотын дарга төсөл хэрэгжүүлэгч нэгжүүдийн удирдлагатай уулзаж, төслүүдийн явцтай танилцлаа

Нийслэлийн Засаг дарга бөгөөд Улаанбаатар хотын Захирагч Д.Сумъяабазар төсөл хэрэгжүүлэгч нэгжүүдийн удирдлагатай уулзан, төслүүдийн явцтай танилцаж, тулгамдаж байгаа асуудлуудын талаар санал солилцлоо

3 өдрийн өмнө