Эмэгтэйчүүдийн хөлбөмбөгийн дэлхийн аварга шалгаруулах 9 дэх удаагийн тэмцээний хүрэл медалийн төлөө тоглолт Австралийн Брисбен хотын 50,000 хүний суудалтай "Lang park" цэнгэлдэхэд талбайн эзэн Австралийн "Матильда" болон Шведийн "Хөх шарууд"-ын хооронд болж, Шведийн шаргал үст бүсгүйчүүдийн ялалтаар (0:2) өндөрлөлөө.
Талбайн эзэд хөгжөөн дэмжигчид, уул, усныхаа өмнө анх удаагаа дэлхийн медаль авахын тулд ихээхээ хичээсэн ч намтар түүх, нөр их туршлагатай Шведийн хөлбөмбөгчид аргагүй л ур чадвар, техник, тактик, хурд, хүч гээд бүхий л талаар илүүрхэн тоглосоор ДАШТ-ээс 4 дэх хүрэл медалиа хүртлээ. Тэд бас нэг мөнгөн медальтай. Олимпоос бас хошой мөнгөтэй, Европын аваргаас алт 1, 3 мөнгөтэй гэхээр Швед бол яах аргагүй эмэгтэй хөлбөмбөгийн хамгийн тогтвортой амжилттай, шилдэг багуудын нэг мөөн.
Олимп , дэлхийн аваргаар нэг л жаахан аз, од нь дутаад, том том багуудыг "мулталдаг" ч өөрсдөө аваргалж чаддаггүй "уламжлал"-тай.
Харин Австрали медаль хүрч чадаагүй ч ард түмнийхээ талархал, хүндэтгэлийг тун ихээр хүлээлээ. Цаашид олон олон охид "матильда"-ийн эгнээнд багтах мөрөөдлийг нь төрүүлж буй нь медалиас ч дутахгүй үнэ цэнэтэй дээ.
Нэгэн сар үргэлжилсэн "Австрали-Шинэ Зеланд 2023" ДАШТ өндөрлөхөд ганцхан тоглолт үлдлээ.
Шинэ аваргыг угтах мөч цагаар хэмжигдээд эхэллээ.
Ц.Энхтүвшин Таван цагариг сонин
