Хэнтий аймгийн Биндэр суманд “Их хуралдай” цогцолбор ашиглалтад оржээ. Энэ талаар аймгийн ЗДТГ-аас “1206 онд Монгол төрийн их хуралдай анх чуулж, их Монгол улсыг тунхаглан, Чингис хааныг их эзэн хаанд өргөмжилсөн түүхэн газар болох Хэнтий аймгийн Биндэр суманд “Их Хуралдай” цогцолбор баригдаж, ашиглалтад орлоо. Цогцолборын загварыг Монгол Улсын урлагийн гавьяат зүтгэлтэн, уран бүтээлч Д.Төртогтох гаргасан бөгөөд барилга нь тэнхлэгээрээ 21 метрийн диаметртэй хагас бөмбөрцөг хэлбэртэй, мөн хэмжээний зоорийн давхартай, Монгол гэрийн хэв шинжийг агуулжээ” гэж тайлбарлажээ.
Ерөнхий сайд Л.Оюун-Эрдэнэ ЗГХЭГ-ын дарга байх үедээ Хэнтий аймагт хэд хэдэн аялал жуучлалын цогцолбор барих ажил санаачилсны нэг нь энэхүү цогцолбор юм. Гэвч уг цогцолбор төсвөөс хоёр тэрбум төгрөг татсан ч хэл ам таталсаар татвар төлөгчдийн мөнгийг үргүйдүүлсэн хөшөө дурсгал, барилгын жагсаалтыг нэмсэн.
Сануулбал, “Их хуралдай” орд цогцолборын барилгын ажил 2018 оны арваннэгдүгээр сард эхэлж, гүйцэтгэгч компаниар “Мөнх-Өргөө” ХХК ажилласан байдаг. Төлөвлөгөө ёсоор цогцолбор 2019 онд ашиглалтад орох ёстой байв. Тус компани барилгын ажлыг мөн оны арванхоёрдугаар сард ажлаа дуусан гэж үзсэн ч зөвхөн барилга угсралтын ажлыг л тооцсон юм. Иймд “Их хуралдай” төрийн мэдэлд очиж, барилгын ажлуудыг гүйцээхээр болсон байдаг. Гэвч барилга дутуу баригдсан, санхүүжилт, цар тахал зэрэг олон асуудал ар араасаа хөвөрсөөр таван жил дамнасны эцэст үүдээ нээж байна.
Б.ЦЭЦЭГ
