Монголд анх удаа олон улсын яруу найргийн наадам болно. Уг наадмыг “Дорнын гэгээн аялгуу” ТББ санаачлан зохион байгуулахаар болсныг өнөөдөр мэдээлэв.
“Дорнын гэгээн аялгуу” ТББ-ын тэргүүн П.Гэрэлт-Од:
-Манай холбоонд ОХУ-ын Буриад, Халимаг, Дундад улсын Шиньжан, Өвөр Монголын уран бүтээлчид хамтарч ажилладаг. Тиймээс Монгол бичиг, хэл соёлтой түмний дунд "Монгол дугаар зуун" олон улсын яруу найргийн наадмыг зохион байгуулна. Энэ наадамд газар газрын яруу найрагчид оролцож буйгаараа онцлогтой. Гадаадын яруу найрагчид оролцож буй учраас нэг, хоёрдугаар шатыг цахимаар хүлээн авч байна. Өнөөдрийн байдлаар яруу найргийн наадамд Шиньжан, Уйгур, Өөртөө засах орны яруу найрагчид, Буриад, Халимаг зэрэг 70, 80 гаруй яруу найрагчид бүртгүүлсэн. Энэхүү үйл ажиллагаа маань Монгол хэл, бичгийг хамгаалах түгээн дэлгэрүүлэх үр шимийг яруу найргаар түгээн дэлгэрүүлэх, урлагаар дамжуулж Монгол хэл, бичгээ дэлхийн анхаарлын төвд хүргүүлэх зорилготой гэлээ.
Наадамд ирж буй шүлгийг дүрсээр авч байгаа аж. Энэ нь иргэдэд яруу найргийг урлаг талаас нь ойлгуулах зорилготой аж. Мөн яруу найргийн наадамд оролцож буй яруу найрагчдын шүлгийг түүвэрлэн ном гаргахаар төлөвлөж байгаа юм байна. Наадмыг олон улсын шүүгч нар шүүх аж.
Б.ЦЭЦЭГ
