ЗХЖШ-ын Сургалт, бэлтгэлийн газар, Монголын Улаан Загалмайн нийгэмлэгтэй хамтран ажиллагааны өмнөх бэлтгэл, сургалтдаа хамрагдаж буй цэргийн алба хаагчдад “Анхны тусламж, ОУ-ын хүмүүнлэгийн эрх зүйн тухай” мэдлэг олгох сургалтыг зохион байгууллаа.
Сургалтыг нээж Монголын Улаан Загалмайн нийгэмлэгийн дэд ерөнхийлөгч Э.Ууганбаяр нийт бие бүрэлдэхүүнд хандаж үг хэлсэн юм. Тэрбээр хэлсэн үгэндээ энхийг сахиулах ажиллагаанд үүрэг гүйцэтгэнэ гэдэг нь дэлхий дээрх хамгийн том хүмүүнлэгийн үйлс болохыг онцлоод алс холын Бүгд Найрамдах Өмнөд Судан Улсын тусламж, дэмжлэг шаардлагатай байгаа энгийн ард иргэдэд энх тайван амьдралыг бэлэглэх эрхэм бөгөөд хариуцлагатай үүргийг залгамжлахаар ажиллагааны өмнөх бэлтгэл, сургалтдаа хамрагдаж буй дайчдынхаа цаашдын хичээл, сургалтад өндөр амжилтыг хүсэн ерөөсөн юм.
Үргэлжлүүлэн Монголын Улаан Загалмайн нийгэмлэгийн хүүхэд, залуучуудын хөтөлбөр хариуцсан ахлагч Б.Мөнхжин гарын доорх эд зүйлсийг ашиглан анхны тусламж үзүүлэх аргачлал болон цэргийн алба хаагчид мэдэж байвал зохих олон улсын хүмүүнлэгийн эрх зүйн байдлын тухай мэдээллийг нийт бие бүрэлдэхүүнд дэлгэрэнгүй танилцуулж төгсгөлд нь хамтарсан дадлага, нэгдсэн хэлэлцүүлгийг зохион байгууллаа.
