Баянзүрх дүүргийн наймдугаар хороонд байрлах нэгэн айлд 33 настай, эмэгтэй бага насны 3 хүүхдийн хамт нэг дор 4 хүн угаартсан байдалтай амь насаа алдсан харамсалтай хэрэг өчигдөр /2023.09.26/ бүртгэгджээ.
Тус айлын утаа мэдрэгч нь ажиллагаагүй байсан учраас Тавантолгой түлш компанийн хяналтын ажилтнуудын бүртгэлд бүртгэлтэй байжээ.
Улмаар есдүгээр сарын 21-23-нд ажилтнууд хашаанд нь очиход эзэнгүй байсан гэх мэдээллийг эх сурвалж өгөв. Мөн дээрх айл нь хашаанаасаа нүүгээд өөр хашаанд буугаад удаагүй байжээ.
Угаартаж нас барж байгаа иргэдийн олонх нь яндангаа салгаж, өрхөө бүтээсний улмаас угаартсан байх магадлалтай. Иймд галаа бүрэн унтарсан ч өрхөө бүү бүтээгээрэй, угаарын аюул отож байгаа гэдгийг сэрэмжлүүлэн хүргэж байна.
Гэр, байшин, орон сууцандаа агаарын сэлгэлтийг тогтмол хийх, яндангаа хөөлөх, бүрэн шаталт дуустал яндагийн хаалтыг хаахгүй байх, пийшин зуухны онгорхой, цоорхой цууралтыг шалгаж бөглөх, угаарын хийн мэдрэгч суурилуулах, уг төхөөрөмжийн хэвийн ажиллагааг тогтмол шалгах, дохиоллыг салгаж унтраахгүй байх зэргээр угаарын хийд хордохоос урьдчилан сэргийлэхийг сэрэмжлүүлж байна.
Э.БУРАМ
