Иргэдийн орлогыг инфляцтай уялдуулан 10 хувиар нэмэгдүүлэхээр 2024 оны төсвийн тодотголд тусгажээ. Тодруулбал, цалин, тэтгэвэр, халамжийг ирэх оны дөрөвдүгээр сарын 1-ээс нэмэгдүүлэхэд 881 тэрбум төгрөг төсөвлөжээ. Энэ талаар Сангийн сайд Б.Жавхлан “Энэ оны долдугаар сарын 1-ээс бид төрийн албан хаагчид, тэтгэвэр авагчид, тодорхой хэмжээний халамжийг нэмсэн. Тэгвэл инфляцитай уялдуулан цалинг ирэх оны хагас жилээс нэмнэ. Бид 881 мянган иргэнээр дамжуулан бид өрхийн орлогыг дэмжиж байна гэсэн үг. Шаардлагатай 881 тэрбум төгрөгийг төсөвт тусгасан. Цаашид жил бүр нэмнэ” гэлээ. Тэрбээр 2024 оны Монгол Улсын төсвийн тодотголыг өнөөдөр танилцуулах үеэр уг мэдээллийг өгсөн билээ.
Цалин, тэтгэвэр, халамжийн нэмэгдэлд нийт 881 мянган иргэн хамрагдах тооцоо байна. Тодруулбал, 217.7 мянган мянган төрийн албан хаагчдын /төрийн нийтлэг үйлчилгээний албан хаагчид/ цалинг 20 хувиар нэмэгдүүлэхэд 532.4 тэрбум төгрөгийг төсөвт суулгажээ. Мөн 516.8 мянган ахмад настны тэтгэврийг нэмэгдүүлэхэд 308.6 тэрбум, нийгмийн халамж тэтгэвэр авах 146.9 мянган иргэнд 40 тэрбум төгрөгийг тус бүр төсөвлөжээ.
Б.ЦЭЦЭГ
