АНУ-ын Ерөнхийлөгчийн сонгуулийн урьдчилсан дүнгээр Бүгд найрамдах намаас нэр дэвшигч Дональд Трамп ялалт байгуулах магадлал өндөр байна. Хэрвээ сонгуулийн дүн баталгаажвал тэрбээр хоёр дахь удаагаа АНУ-ын Ерөнхийлөгчөөр сонгогдож байгаа юм. Ингээд түүний тухай сонирхолтой баримтуудыг хүргэж байна.

Дональд Жон Трамп 1946 оны 6-р сарын 14-нд Нью-Йоркийн Квинс хотод үл хөдлөх хөрөнгийн хөгжүүлэгч Фред Трамп, Мэри Энн Маклеод Трамп нарын таван хүүхдийн нэг болж мэндэлжээ.

Аав нь Трампыг 13 настай байхад нь Нью-Йоркийн Цэргийн академийн сургуульд явуулжээ.

Тэрбээр Пенсильванийн их сургуулийн Вартон сургуульд шилжихээсээ өмнө Фордхамын их сургуульд суралцаж 1968 онд төгсжээ

Дональд Трамп олимпын цаначин, загвар өмсөгч асан Ивана Зельниковатай 1977 онд гэрлэж, хос Иванка, Эрик, бага Дональд гэсэн гурван хүүхэдтэй болсон бөгөөд тэд 1990 онд салжээ.

1984 онд Нью-Йоркийн тавдугаар өргөн чөлөөнд Трамп цамхаг баригдаж дууссан байна.

Трамп бол АНУ-ын түүхэн дэх хамгийн баян ерөнхийлөгч юм. Форбес сэтгүүлийн мэдээлснээр 2017 оны байдлаар Трампын хөрөнгө 3.5 тэрбум доллар болжээ.