Олимпын наадмын хамгийн их үзэгчтэй, дэлхий нийтийг шуугиулдаг төрөл бол яах аргагүй хөнгөн атлетик билээ. Өнгөрсөн шөнө эрэгтэйчүүдийн 100 метрийн финал болж шилдгүүд тодров. Финалын гараанд АНУ-3, Ямайкаас 2, “Токио 2020” олимпын аварга Италын Ламонт Жэйкобс болон Өмнөд Америк, Ботсваны 8 шилдэг тамирчин өрсөлдсөн. Уралдаан эхэлж барианд орох мөчид ширүүн өрсөлдөөн болж, хэн нь түрүүлж орсныг харахад бэрхшээлтэй байлаа. Тиймээс фотофинишээр ялагчийг тодруулав. Ингээд АНУ-ын тамирчин Ноа Лайлс 9,784 секундээр алтан медаль, Ямайкийн Томпсон 9,789 секундын амжилтаар мөнгөн медаль хүртлээ. Хоёр тамирчны хооронд ердөө 0,005 секундын зөрүү гарчээ. Харин хүрэл медалийг АНУ-ын Фрэд Керли 9,81 секундын амжилтаар хүртлээ.
Дашрамд финалд өрсөлдсөн тамирчид бүгд 10 секундээс бага хугацаанд замаа дуусгаж барианд орсон.
- Ноа Лайлс 9.79
- Кишэйн Томпсон 9.79
- Фрэд Кэрли 9.81
- Акани Симбинэ 9.82
- Ламонт Марселл Жэйкобс 9.85
- Лециле Тебого 9.86
- Кеннет Беднарек 9.88
- Облик Севил 9.91
