Дэлхийн дуурийн урлагийн амьд домог Пласидо Доминго тэргүүтэй Дэлхийн шилгүүд АПУ ХК-ийн урилгаар Монгол Улсад ирж, Ардын жүжигчин Э.Амартүвшинтэй хослон дууллаа. АПУ компанийн 100 жилийн ойд зориулсан, сонгодог урлагийн “Сentennial Celebration” тоглолтыг Дуурь Бүжгийн Эрдмийн Театраас Сүхбаатарын талбайд шууд дамжуулан, олон нийтэд үзүүлэв.
АПУ компанийн 100 жилийн ойн баярт Дэлхийн 20 гаруй улсаас хамтран ажилладаг, Дэлхийн шилдэг техник, технологи нийлүүлэгчид болон худалдааны түншүүд, олон улсын санхүүгийн байгууллагуудын төлөөлөл хүрэлцэн ирж оролцож байна.
Энэ түүхэн ойг тохиолдуулан, Дэлхийн алдарт гурван тенорын нэг, Грэммигийн 12 шагналын эзэн Пласидо Доминго, энэ цаг үеийн алдарт баритон, Дэлхийн бүхий л гол тайзнаа гайхамшигт хоолойгоороо эх орныхоо нэр хүндийг өндөрт өргөж яваа Монгол Улсын Ардын жүжигчин Э.Амартүвшин, олон улсад нэр хүнд нь тасралтгүй өсөж буй гайхалтай сопрано Нина Минасян, орчин цаг үеийн хамгийн агуу тенор дуучдын нэг алдарт "Ла Скала" театрын дуучин Фабио Сартори, Дэлхийд тэргүүлэх залуу удирдаачдын нэг Гаэтано Ло Коко нарыг АПУ компани эх орондоо урьж, “Centennial Celebration” дуурийн сонгодог тоглолтыг зохион байгууллаа.
