Чингис хаан үндэсний музейд 7 дугаар сарын 2-нд дэлгэсэн "Чингис хаан: Монголчууд Дэлхийг өөрчилсөн нь” үзэсгэлэнг сар гаруйн хугацаанд 10.300 гаруй үзэгч үзээд байна. Монголын эзэнт гүрэн, Ил хант, Юань, Кидан улстай холбоотой дурсгалуудыг дэлгэсэн энэ үзэсгэлэнгийн хамгийн сонирхолтой нь монгол бичгийн гайхамшгийг илэрхийлсэн Ил хаан Өлзийтийн захидал. Монгол угсааны хааны захидлыг монголчууд анх удаа нүдээр үзэж байгаа нь энэ юм. Ил хаан Өлзийт 1305 онд уг захидлыг монгол бичгээр бичиж, тамгаа даран, Францын хаан Гоо Филиппт илгээжээ. Энэ захидал монгол хаадын бичиг соёлын дахин давтагдашгүй үнэт өв, төрт ёсны аугаа уламжлал, монгол бичгийн гайхамшиг, Монголын их амар амгаланг бүрэн илэрхийлдэг, үнэлж баршгүй түүхэн баримтад тооцогддог.
Монголчууд Дэлхийд ямар нөлөө үзүүлж, амар амгаланг тогтоон, соёл, худалдаа, эдийн засаг, улс төрийн хувьд хэрхэн өөрчилснийг илтгэх эртний улсуудын түүхтэй холбоотой дурсгалууд, Монголын эзэнт гүрний дурсгал, хаад, түүний угсааныхны дурсгал хэсгээс уг үзэсгэлэн бүрджээ.
Монголын эзэнт гүрэн, Ил хант, Юань, Кидан Улстай холбоотой дурсгалуудыг хадгалж буй Луврын музей, Францын Үндэсний Архив, Севрийн Үндэсний Керамикийн музей, Чимэглэлийн Урлагийн музей болон Швейцарийн Ритберг музей, цуглуулагч Сэм ба Мирна Майэрсын цуглуулга зэрэг Европын таван томоохон музей, архиваас татаж авчирсан үзмэрүүдийг толилуулж байна. Ил хаант, Юань, Кидан Улс, Хүннү үеийн ховор чухал дурсгалууд нь Монгол нутгаас олдоогүй бөгөөд Чингис хааны байгуулсан Их Монгол Улсын бүх харьяа улсуудын дурсгалуудыг анх удаа нэг дор дэлгэжээ.
Энэ үзэсгэлэнг 8 дугаар сарын 25 хүртэл гаргаж байгаа. Дуусахад 2 хоног үлдээд байна. Үүний дараа 2025 оны гуравдугаар сард Прага хот дахь Үндэсний музей, 10 дугаар сард Цюрих хотын Ритберг музей, 2026 онд Берлиний түүхийн музей, Канад, АНУ зэрэг улсад дэлгэхээр төлөвлөж байна.
