Монголын ногоон нам шинэ даргаа улсын бүртгэлд бүртгүүлэхээр 8 дугаар сарын 20-нд Улсын дээд шүүхэд ханджээ. Тус намын итгэмжлэгдсэн төлөөлөгчийн өргөдлийг Улсын дээд шүүхийн Захиргааны хэргийн танхимын нийт шүүгч 9 дүгээр сарын 3-нд хэлэлцээд, буцаажээ. Улс төрийн намын тухай хууль (Шинэчилсэн найруулга)-ийг дагаж мөрдөх журмын тухай хуульд заасны дагуу тус нам эхлээд, дүрмээ хуульд нийцүүлж, шинэчлэн бүртгүүлэх ёстой аж. Үүний дараа даргаа бүртгүүлэх юм байна.
Улс төрийн намын тухай (Шинэчилсэн найруулга) хууль 2024 оны 1 дүгээр сарын 1-ний өдрөөс үйлчилж эхэлсэн юм. Уг хууль хүчин төгөлдөр болохоос өмнө байгуулагдсан улс төрийн намууд 2024 оны 7 дугаар сарын 1-нээс хойш 6 сарын дотор намын дүрэм, хөтөлбөр, дотоод зохион байгуулалтыг шинэ хуульд нийцүүлэн, Улсын дээд шүүхэд бүртгүүлэх үүрэгтэй.
