Бүх нийтээр мод тарих өдөртэй холбогдуулан Ерөнхийлөгчийн Байгаль орчин, ногоон хөгжлийн бодлогын зөвлөх Н.Батхүү мэдээлэл өглөө.
Нийслэлийн найман байршилд 5 дугаар сарын 11-18-нд 300 гаруй байгууллага мод тарина. Харин аймгууд маргаашнаас эхлэн, төвлөрсөн 33 байршилд дөрвөн сая хүртэл мод тарих юм. Аймаг бүр 10 хүртэлх гол, горхийг сонгон, нэг гол дээр 10 га хүртэлх талбайг хоёр жилийн хугацаанд ойжуулахаар бэлтгэж байна. Ойн мэргэжлийн байгууллагууд мод тарих талбай, тарьц, суулгац бэлтгэх, тарьсан модоо жилийн турш услах, арчлах чиглэлээр иргэд, байгууллага, аж ахуйн нэгжтэй хамтран ажиллана.
Нийслэлд “Тэнгэр плаза”, Модлог ургамлын цуглуулгын цэцэрлэг, Ялалтын талбайд мод, бут, сөөгний тарьц, суулгацын үзэсгэлэн худалдааг гаргах бол аймаг, сумд төв талбайдаа зохион байгуулж, худалдан авагчдад заавар, зөвлөмж өгөх юм.