Монгол Улс, АНУ-ын хооронд өнөөдөр агаарын харилцааны хэлэлцээр байгуулж, онгоц шууд нисгэх эхний бэлтгэлийг хангалаа. “Иргэний нисэхийн аюулгүй байдлыг хангахтай холбогдсон баримт, мэдээлэл болон түүнд хамаарах АНУ-ын аюулгүй байдлын эмзэг мэдээлэл солилцох тухай гэрээ”-нд Монгол Улсын Иргэний нисэхийн ерөнхий газрын дарга Ч.Мөнхтуяа, АНУ-ын Үндэсний аюулгүй байдлын яамны Тээврийн аюулгүй байдлыг хангах захиргааны дэд дарга Гари Ренфроу нар гарын үсэг зурав. Энэ гэрээг байгуулснаар хоёр улс нисэхийн аюулгүй байдлыг хангахтай холбогдсон баримт, мэдээллийг харилцан солилцох хүрээг тогтоосон юм.
Олон улсын иргэний нисэх, тээврийн аюулгүй байдлын системд учирч болзошгүй аюул заналхийллийг илрүүлэх, тус тусын нисэхийн болон тээврийн аюулгүй байдлын тогтолцоо, дүрэм журам, үйл ажиллагааг сайжруулахад солилцсон туршлага, баримт, мэдээллийг хамгаалахад энэ гэрээг баримтална. Хоёр улсын агаарын тээврийн харилцааг өргөжүүлж, АНУ-ын Тээврийн аюулгүй байдлыг хангах захиргаа болон Монгол Улсын Иргэний нисэхийн ерөнхий газар хоорондын хамтын ажиллагааг өргөжүүлэх боломжийг энэ гэрээ олгож байна.