Монголын анхны мэргэжлийн дугуйчин С.Жамбалжамц өнгөрсөн онд Испанийн "Бурхос Би Эйч" багтай гэрээ байгуулсан юм. Тэгвэл өнгөрсөн 7 хоногийн турш манай дугуйчин "Вольта Каталуния" тэмцээнд оролцлоо. С.Жамбалжамц нийт 1,173.4 км замыг 30:18:53 цагт замаа дуусгаснаар 132-д жагсжээ. Тэрээр уулын замд сайн уралдаж 26-д бичигдсэнээр багтаа 6 оноо авчирсан юм. Нийт 25 баг оролцсон тус уралдаанд "Бурхос Би Эйч" баг нь 19-д бичигдэв. Тус уралдаан 7 хоногийн турш үргэлжилсэн ба Словенийн алдарт дугуйчин, Тур Де Франсын хошой аварга, сүүлийн 3 жил дараалан дэлхийн чансааг өнгөлж буй Тадей Погачар түрүүллээ.
Т.Погачар 28:21:29 цагт барианд орсноор бүх тамирчдыг тэргүүлээд зогсохгүй нийт оноогоор манлайлж, уулын замын шилдэг дугуйчнаар тодорчээ. Нийт 7 гарааны 4 нь түрүүлсэн аж. Түүний араас Испанийн Микель Ланда Маена +3:41 минутаар хоцорсон бол Колумбын Еган Бернал +5:03 минутаар 3 байранд оржээ.
Ц.Ананд