Булган аймгийн Хангал сумыг Монгол Улсын Ерөнхийлөгчийн зарлигаар Алтангадас одонгоор шагналаа. Гэр бүл, хөдөлмөр, нийгмийн хамгааллын сайд Л.Энх-Амгалан тус сумын 100 жилийн ойн баяр наадмын нээлтийн үеэр уг шагналыг гардуулав.
Түшээт хан аймгийн Эрдэнэ Дайчин вангийн хошууг 1924 онд Хангал сум болгосон байна. Одоо энэ сум Сөрт, Урт, Хонгор-Өндөр, Хялганат гэсэн 4 багтай, 1493 өрхтэй, 4543 хүн амьдардаг. Булган аймгийн 16 сумаас газар нутгийн хэмжээгээр 13 дугаарт, хүн амын тоогоор 3 дугаарт Булган, Хутаг-Өндөр сумын дараа ордог.
Аймгийн төвөөс 110 км зайд байрладаг. Сумын баруун захын цэг Хараатолгой, хойд захын цэг Сэлэнгэ мөрөн, Сэлэнгийн татуургын уулзвар Дөшлүүр, зүүн захын цэг Шувуутын даваа, баруун урд захын цэг Ингэтийн даваа, урд захын цэг Хутаг-Өндөр уул юм. Далайн түвшнээс дээш 800-2000 метрт өргөгдсөн, 165.6 мянган га газар нутагтай.