Бидний дунд эгэл жирийн чимээгүй баатрууд олон бий. Хэн нэгний амьдралыг өөрчлөх, амь насыг нь аврах гэдэг тийм ч их тохиодог завшаан биш. Хэдхэн үгс, ганцхан уулзалт, цөөн хормоос л энэ бүхэн эхэлдэг. Гэлээ ч аюулыг сөрж амь биеэ үл хайхран бусдыг аврахын төлөө байдаг чимээгүй баатрууд бол ОНЦГОЙ байдлын албан хаагчид. Өнөөдөр тэд мөр зэрэгцэж явсан нэгэн эрхэм нөхрөө үүрд алдлаа.
Од болж тэнгэрт харвасан ч бусдыг аврахын төлөө явсан түүний сайхан сэтгэл, тусч зан, ач гавьяа сүүн цацал шиг. Э.Энхболдыг бид удам дамжсан ГАЛ СӨНӨӨГЧ гэдгээр нь мэдэх болжээ.
-----------------------------------------------------------
2023 оны арванхоёрдугаар сарын 19-ны өглөө уйтай гашуун мэдээ олныг цочирдуулж айл гэрийг өнчрүүлэв. Долоон хүний амийг авч одсон гал түймэр Хан-Уул дүүргийн гуравдугаар хорооны нутаг дэвсгэрт байрлах нэгэн орон сууцанд гарсан нь даанч харамсалтай. Эхнэр, хүүгээ, эгч ахыгаа, үр хүүхэд ач зээгээ ганцхан хоромд алдсан хүмүүсийн уй гунигийг үгээр илэрхийлэхийн аргагүй.
Амь насаа алдсан долоон хүний нэг нь албан үүргээ гүйцэтгэж явсан онцгой байдлын албан хаагч байлаа. Бусдыг аврахаар явсан түүний гавьяаг бид өнөөдөр халаглаж дурсаад маргааш нь мартах учиргүй.
Э.Энхболд Гал унтраах 14 дүгээр ангийн салааны захирагч, дэслэгч байв. Мөн өсөх ирээдүйтэй боловсон хүчин.
Түүнийг Онцгой байдлын ерөнхий газрын дарга, хошууч генерал Г.Ариунбуян “Манай алба хаагч иргэдийн аюулгүй байдлыг хангаж, утаажилтын бүсээс гаргаж байх явцдаа угаартаж, ухаан алдсан. Эмнэлгийн байгууллагад хүргэгдсэн ч харамсалтайгаар амиа алдсан. Амиа алдсан алба хаагч маань удам дамжсан аврагч. Энэ жил БНСУ-д гал сөнөөгчийн сургууль төгсөөд ирсэн залуухан боловсон хүчин байсан” гэж дурссан юм.
Аавынхаа ажил мэргэжлийг өвлөсөн тэрбээр 1996 онд Улаанбаатар хотод Д.Эрдэнэбаатарын ууган хүү болж мэндэлсэн юм. Түүний аав Нийслэлийн Онцгой байдлын газрын дэд даргаар ажиллаж байлаа.
Алба мэргэжлийг нь залгуулан хүү Энхболд нь гал сөнөөгч мэргэжлийг сонгож, идэр 27 насандаа салбартаа гялалзаж явсан юм.
Түүнийг журмын нөхөд нь “Эгэл даруухан, өөрийнхөөрөө ажилладаг, сурч мэдэх, хөгжье гэсэн хүсэл эрмэлзэлтэй сайхан залуу байсан. Гал сөнөөгчөөс эхлээд дээшээ дэвшсэн” гэж тодорхойлжээ.
Тэр хүнд хэцүү, шантарч ухармаар тийм л ОНЦГОЙ албанд үүрэг гүйцэтгэдэг байсан ч хэзээ ч хойш ухарсангүй. Эргэж ирэх эсэх нь мэдэгдэхгүй өчнөөн дуудлага, гал ус, үерийн гамшигт өдөр шөнийг умартаж бусдын төлөө амь насаа үл хайхран ажилладаг ч мэргэжилдээ хайртай, ажилдаа дуртай байсныг түүх нь харуулна. Түүний намтраас харвал,
Э.Энхболд 2016 онд Хууль сахиулахын Их сургуулийн Ахлагчийн сургуулийг “Аврагч, гал сөнөөгч” мэргэжлээр төгсөж, Онцгой байдлын газрын 10, 26 дугаар ангид гал сөнөөгчөөр ажиллаж байж. Энэ жил БНСУ-ын Чангвон хотын Чангшин их сургуулийг Гал гамшгийн аюулгүй байдлын инженер, Нисэхийн механикийн инженер мэргэжлээр төгсчээ. Эх орондоо ирээд наймдугаар сараас ХУД-ын Гал унтраах аврах ангийн 14 дүгээр хэлтэст томилогдон ажиллаж байв.
Түүнтэй хамт мөр зэрэгцэж явсан албан хаагчид нь талийгаачийг өчигдөр сүүлчийн замд нь үдсэн юм. Гал унтраах аврах ангийн улаан тэрэгнүүд энэ удаа дуудлагад биш мөр зэрэгцэж хамт ажиллаж явсан найзыгаа, дүүгээ үдэхээр гашуудлын цуваа үүсгэсэн нь даан ч гунигтай өдөр байлаа.
Тэр эгэл даруу бөгөөд шаргуу хөдөлмөрч, хөгжилтэй найрсаг дүр төрхөөрөө хайртай хүмүүсийнхээ сэтгэлд үүрд мөнхөрлөө. Аавынхаа алдрыг дуурсгаж удам дамжсан гал сөнөөгчөөр ажиллаж явсан энх цагийн баатруудын нэг байсан түүний ач гавьяаг бид мартах учиргүй.
Б.ЦЭЦЭГ