ШХАБ-ын гишүүн орнуудын Гадаад хэргийн сайд нарын уулзалт Мягмар, Лхагва гаригт Казахстаны нийслэл Астана хотноо болсон.
ОХУ-ын Гадаад хэргийн сайд Лавров ШХАБ-ын Гадаад хэргийн сайд нарын зөвлөлийн уулзалтын дараа "ШХАБ-д элсэх дараагийн улс нь Монгол байх нь ойлгомжтой. Монгол Улсын газар зүйн байршлыг харвал ШХАБ-д элсэхэд бүрэн нийцнэ. Орос, Хятад болон ШХАБ-ын бусад бүх гишүүд Монголыг элсэхийг дэмжинэ" гэж ярьжээ.
Одоогийн байдлаар 14 орон ШХАБ-тай яриа хэлэлцээний түншийн статустай байгаа аж. Лаос, Алжираас мөн түншийн статусын хүсэлт хүлээн авчээ. Лавровын хэлснээр эдгээр улстай харилцаагаа хөгжүүлэхийн хэрээр яриа хэлэлцээний түнш, ажиглагчийн статусыг давж, цаашлаад гишүүнчлэлийн хүсэлтээ гаргаж болно.
Сергей Лавров 10 жилийн өмнө мөн Монголыг ШХАБ-ын дараагийн гишүүн улс болно гэж хэлж байсан боловч Монгол Улсын тухайд энэ хугацаанд төвийг сахисан байр суурийг баримталсаар ирсэн юм.
