Мексикийн хойд хэсэгт ерөнхийлөгчийн сонгуульд нэр дэвшигч Хорхе Альварес Майнезын сонгуулийн сурталчилгааны үеэр хүчтэй салхи шуурсны улмаас тайз нурж, есөн хүн амиа алдаж, 50 орчим хүн шархадсан талаар албаныхан мэдээлэв. Лхагва гарагт Нуэво-Леон мужийн Сан Педро Гарза Гарсиа хотод Иргэдийн хөдөлгөөний намын сонгуулийн сурталчилгааны жагсаалын үеэр уг үйл явдал болжээ.
“Одоогийн байдлаар ослоор нас барсан хүмүүсийн дунд насанд хүрээгүй нэг хүүхэд байсан гэдгийг хэлж байгаадаа харамсаж байна. Эмнэлэгт байгаа шархадсан хүмүүсийн биеийн байдал харьцангуй тогтвортой байна" гэж Нуэво-Леон мужийн захирагч Самуэль Гарсиа "X" хуудсандаа нийтэлжээ.
Иргэний хөдөлгөөний намаас ерөнхийлөгчийн сонгуульд нэр дэвшигч Альварес Майнез "Би хэзээ ч ийм гэнэтийн зүйл болно гэж бодсонгүй. Салхи гэнэт маш хүчтэй шуурсан" гэж хэлсэн байна. "Мексикийн үндэсний армийнхан тусламж үзүүлэхээр хэргийн газар ажиллаж байгаа" гэж Дотоод хэргийн сайд Луиса Алкальде олон нийтийн сүлжээнд мэдэгдэв.