Шотланд болон АНУ-д хийсэн судалгаагаар агаар мандал дахь нүүрстөрөгчийн давхар исэл сүүлийн 50 мянган жилийн аль ч үеийнхээс 10 дахин хурдан нэмэгдэж байгаа нь батлагджээ. Тодруулбал, Орегон мужийн их сургууль болон Сент-Эндрюсийн их сургууль тэргүүтэй судлаачдын баг Антарктидын мөсөнд химийн нарийвчилсан шинжилгээ хийжээ. Үндэсний Шинжлэх Ухааны Академийн (PNAS) сэтгүүлд нийтлэгдсэн судалгаа нүүрстөрөгчийн давхар ислийн (CO2) хэмжээ урьд өмнө байгаагүйгээр хурдан нэмэгдсэн гэдгийг харуулав. Энэ нь хүний буруутай үйлдлээс үүдэлтэй нь ойлгомжтой юм.
Өмнө нь мөстлөгийн үе болон байгалийн бусад хүчин зүйлсээс шалтгаалж, энэ хэмжээ өөрчлөгддөг байсан бол өнөөдөр хүний хийж буй үйлдлүүдийн хүчин зүйлээс болж нэмэгдэж байгаа гэж эрдэмтэд үзэж байна. Орегон мужийн их сургуулийн Дэлхий, далай, атмосферийн шинжлэх ухааны коллежийн (CEOAS) профессор, судалгааны удирдагч Кэтлин Вендт "Өнөөдөр CO2-ын өсөлтийн хурд үнэхээр урьд өмнө байгаагүйгээр нэмэгдэж байна. Бидний судалгаагаар өнгөрсөн үеийн СО2-ын өсөлтийн хамгийн хурдацтай өсөлтийг тогтоосон бөгөөд өнөөдөр хүний ялгаруулалтаас шалтгаалж байгаа хэмжээ нь 10 дахин их байна” хэмээжээ.
