Apple компани Siri дуут туслах болон үйлдлийн системээ OpenAI-ийн ChatGPT-ээр сайжруулахаар болжээ. OpenAI-тай хамтын ажиллагаагаа эхлүүлж, генератив хиймэл оюуны ChatGPT үйлчилгээг бүтээгдэхүүнүүддээ нэвтрүүлэхээр болсноо даваа гарагт жил бүр зохион байгуулдаг хөгжүүлэгчдийн үзэсгэлэн дээр зарласан бөгөөд өөр олон шинэ боломжуудыг зарлав.
Энэ нь "Apple Intelligence" нэртэй шинэ хиймэл оюун ухааны системийн нэг хэсэг бөгөөд хэрэглэгчдэд Apple-ийн төхөөрөмжүүдийг илүү хялбар удирдах арга замыг санал болгох зорилготой юм. Ингэснээр iPhone болон Mac үйлдлийн системийн шинэчлэлтүүд нь OpenAI-тай хамтран ChatGPT-д нэвтрэх боломжийг олгоно.
Тэрбумтан Илон Маск хоёр компанийн түншлэлийг таашаахгүй байгаагаа илэрхийлж, OpenAI-ийн хиймэл оюуны модель үйлдлийн системийн түвшинд нэвтэрвэл аюулгүй байдлын үүднээс Apple-ийн төхөөрөмжүүдийг компанидаа ашиглахыг хориглоно гэсэн нь анхаарал татаж байгаа юм.
