АНУ-ын Ерөнхийлөгч Жо Байден, БНХАУ-ын дарга Ши Жиньпин нар мягмар гарагт хоёр улсын хоорондын хурцадмал байдлыг намжаах зорилгоор утсаар холбогдон ярилцжээ.
Хоёр талын харилцааг тогтвортой байлгах, сөргөлдөөн, өдөөн хатгалтаас зайлсхийх асуудал болон сүүлд арваннэгдүгээр сард уулзснаас хойш улам эмзэг сэдэв болсон Тайвань, ТикТокийн гэх мэт асуудлуудыг хөндөн ярилцсан байна.
Гэвч Тайвань болон эдийн засгийн асуудлаар нэлээд санал зөрөлдөөнтэй байсан бөгөөд Жо Байден Тайванийг дэмжиж байгаагаа онцолсон ч Ши Жиньпин Өмнөд Хятадын тэнгист АНУ хөндлөнгөөс оролцох нь улаан шугам гэжээ.
Ши Жиньпин мөн АНУ-аас Хятад болон Хятадын өмчит компаниудад тавьсан хориг арга хэмжээгээ "Хятадын эдийн засаг, худалдаа, шинжлэх ухаан, технологийг таслан зогсоох арга хэмжээ" хэмээж "Хэрэв АНУ Хятадын өндөр технологийн хөгжлийг дарангуйлж, Хятадыг хууль ёсны хөгжлийн эрхийг нь хасахыг шаардах юм бол бид зүгээр суухгүй" гэж мэдэгдлээ.
Уилсон төвийн захирал Роберт Дэйли "Энэхүү харилцан яриа нь улс орнууд харилцаагаа сайн зохицуулахыг эрмэлздэг гэдгийг дэлхий дахинд харуулах гэсэн оролдлого байсан" гэж хэлсэн байна.
"Тайванийг Вашингтон дэмжиж, Хятадын эсрэг хориг арга хэмжээ авахыг эрмэлзэж байгаа нь эрсдлийг бууруулах биш харин эрсдэлийг бий болгох явдал" гэдгийг Ши Жиньпин онцлон хэлэв.
АНУ-ын ерөнхийлөгч "Тайваний хоолойгоор дамжин энх тайван, тогтвортой байдал болон өмнөд Хятадын тэнгист хууль дээдлэх, чөлөөтэй зорчих эрх чөлөөг хадгалах нь нэн чухал" гэж АНУ үзэж байгааг онцолжээ.