Өнөөдөр буюу лхагва гарагт Тайваний зүүн эрэгт 7.4 магнитудын хүчтэй газар хөдлөлт болжээ. Энэ нь Тайваньд сүүлийн 25 жилд тохиолдсон хамгийн хүчтэй газар хөдлөлт гэж Газар хөдлөлт судлалын албаныхан мэдэгдэв.
Японы цаг уурын агентлагийн мэдээлснээр 3 метр хүртэлх цунамигийн давалгаа Японы баруун өмнөд эргийн өргөн уудам нутагт хүртэл хүрэх төлөвтэй байна" гэжээ. Филиппиний газар хөдлөлт судлалын агентлаг мөн цунамигийн сэрэмжлүүлэг гаргасан байна.
Лхагва гарагийн газар хөдлөлт орон нутгийн цагаар 07:58 цагт (GMT 23:58) 15.5 км-ийн гүнд болсон бөгөөд дөрөв ба түүнээс дээш баллын дор хаяж есөн удаа чичиргээ үүсгээд байна.
Хятадын зүүн өмнөд Фужиан мужийн зарим хэсэгт газар хөдлөлт мэдрэгдсэн гэж Хятадын төрийн хэвлэл мэдээллээ.
Орон нутгийн хэвлэл мэдээллийн хэрэгслээр цацагдаж буй бичлэгт орон сууцны барилгууд нурж, хүмүүсийг гэр, сургуулиас нь нүүлгэн шилжүүлж байгааг харуулжээ. Газар хөдлөлтийн улмаас машинууд эвдэрч, дэлгүүрийн доторх эд зүйлс эмх замбараагүй болсон гэж орон нутгийн ТВBS телевизээр цацсан байна.
1999 оны есдүгээр сард Тайваньд 7.6 баллын хүчтэй газар хөдлөлт болж, 2400 хүн амиа алдаж, 5000 барилга нурж байсан.
