Азийн тэргүүн баян болох Энэтхэгийн тэрбумтан Мукеш Амбанигийн бага хүүгийн энэ оны эхнээс эхэлсэн хуримын үйл ажиллагаа сүүлчийн шатандаа шилжиж байна. 29 настай Анант Амбани, түүний эхнэр Радхика Мерчант нарын Хинду шашны уламжлалын дагуух хуримын ёслол долдугаар сарын 12-нд эхэлж, гурван өдөр үргэлжлэх юм.
Хуримыг угтсан гала тоглолт өнгөрсөн долоо хоногийн Баасан гарагийн орой зохион байгуулагдаж, Канадын поп од Жастин Бибер оролцжээ. Хосуудын хуримын өмнөх үдэшлэгт Рианна оролцсон бол дараагийн үдэшлэг буюу Газар дундын тэнгисийг тойрон аялах аялалд 90-ээд оны залуусын хайрртай хамлаг "The Backstreet Boys", дуучин Кэти Перри, Италийн тенор Андреа Бочелли нар оролцсон юм.
Мукеш Амбанигийн бага хүү Анант Амбани, эхнэр Радхика Мерчан нар өнгөрсөн амралтын өдөр хуримын ёслолын өмнөх үдэшлэгээ тэмдэглэсэн бөгөөд уг үдэшлэг дээрээ Канадын од дуучин Жастин Биберийг урьж дуулуулжээ.
Лос-Анжелес хотоос ниссэн Бибер тухайн өдрийн өглөө Энэтхэгийн санхүүгийн нийслэл Мумбай хотын нисэх буудалд ирсэн байна. Баасан гарагийн гала тоглолтод Болливүүдийн од Салман Хан зэрэг олон алдартнууд оролцжээ. Биберийг энэ тоглолтынхоо төлөө $10 саяыг авсан гэж Энэтхэгийн хэвлэлүүд мэдээлж байгаа юм.
Рианна дуулсныхаа төлөө 7 сая доллар (5.5 сая фунт стерлинг) авсан гэж шуугиж байсан бол Жастин Биберт 10 сая доллар санал болгосон байна.
Тэрбумтан Мукеш Амбани хүүхдүүдийнхээ хуримд гар татдаггүйгээрээ алдартай. Тэрбээр 2018 онд охиныхоо хуримд $100 саяыг зарцуулж, поп од Бейонсег дуулуулж байжээ. Олон салбарт үйл ажиллагаа явуулдаг Reliance Industries группийн ерөнхийлөгч 67 настай Амбани нь Форбс сэтгүүлийн тооцоолсноор $113 тэрбумын хөрөнгөтэй бөгөөд дэлхийн тэрбумтнуудын жагсаалтын 11 дүгээрт бичигддэг. Тэр бас Энэтхэгийн ерөнхий сайд Нарендра Модигийн ойрын холбоотон юм.