Монголын улаан загалмай нийгэмлэг, БНХАУ-ын Улаан загалмай нийгэмлэг, ӨМӨЗО-ы Улаан загалмай байгууллага 2019 оноос эхлэн “Бүс ба зам” төслийн хүрээнд гамшгийн эрсдэлийг бууруулах, хариу арга хэмжээ авах, нийгмийн эрүүл мэндийг дэмжих чиглэлээр олон төсөл, хөтөлбөр хэрэгжүүлж байна. Хоёр орны Улаан загалмай байгууллагуудын хамтын ажиллагааны хүрээнд “Бүс ба зам-Гэрэлт аялал” хөтөлбөрийн хүрээнд ӨМӨЗО-ы "Чао Жү" нүдний эмнэлэг, Монгол Улсын 2 дугаар төв эмнэлэг хамтран, энэ хугацаанд 425 хүнд нүдний болор солиулах мэс заслыг үнэ төлбөргүй хийж, харааг нь сайжруулжээ.
Энэ онд төлөвлөсөн ёсоор 130 гаруй ахмадыг Улсын 2 дугаар төв эмнэлэгт эрүүл мэндийн урьдчилсан үзлэгт хамруулахад, 114 нь нүдний болор солиулах хагалгаанд орохоор болсон байна. Тэднийг 9 дүгээр сарын 9-12-нд БНХАУ-ын Эрээн хотын төв эмнэлэг, ӨМӨЗО-ы "Чао Жү" нүдний эмнэлэгт шинжилгээнд хамруулан, нүдний болор солиулах мэс засал хийлээ. Уг мэс засал амжилттай болж, ахмадууд эх орондоо эргэн ирсэн гэж Монголын улаан загалмай нийгэмлэг мэдээллээ.