“Бид бэлэн байна, наадмын туршид ч бэлэн байх болно. Бид энэхүү наадамд олон жилийн турш бэлтгэсэн бөгөөд нээлтийн ёслол баасан гарагт болж, түүний дараачаас тэмцээн уралдааны шийдвэрлэх долоо хоног эхэлнэ” гэж Ерөнхийлөгч Эмманул Макрон цохон тэмдэглэжээ.
Францын аюулаас хамгаалах хүчнийхэн баасан гарагт болох Олимпын наадмын нээлтийн ёслолын өмнө бэлэн байдлаа хангасаар байна. Францын түүхэн дэх хамгийн том аюулгүй байдлын хүчнийг байршуулсан бөгөөд Парист 75,000 цагдаа, цэрэг, хөлсний харуулууд эргүүл хийж байгаа юм. Зам, метроны буудлуудыг хаасан бөгөөд 44 мянга орчим хаалт босгосон байна. Мөн Сена гол болон түүний эргэн тойронд нэвтрэхийг хүссэн оршин суугчид болон бусад хүмүүст зориулсан QR кодын нарийн системийг бий болгожээ.
Зуны Олимпын нээлтийн ёслолыг түүхэндээ анх удаа төв цэнгэлдэх хүрээлэнгээс өөр газарт хийхээр төлөвлөж байгаа билээ. Ёслолын үеэр 2019 онд гал түймэрт өртсөн Нотр-Дам сүм зэрэг дэлхийд алдартай дурсгалт газруудын хажуугаар 6000-7000 тамирчин 85 усан онгоц, завиар Сена мөрний дагуу парадад оролцоно. Урьдчилан тасалбар авсан 300 мянга хүртэлх тооны хүн үзэгчдийн суудал ба мөрний эрэг дээрээс нээлтийг ёслолыг үзэх бол 200 мянга гаруй хүн ойролцоох орон сууцны байшингуудын цонхоор үзэх ажээ.
Их Британийн 250 орчим офицер, 50 цагдаагийн нохой ирэх долоо хоногт Францад байх бөгөөд зарим нь Парисын төв орчмын Францын явган эргүүлд нэгдэнэ. “Бид анх удаагаа томоохон арга хэмжээнд офицеруудаа ийм байдлаар илгээж байна" гэж Үндэсний цагдаагийн зохицуулалтын төвийн дарга, ахлах ахлагч Мэтт Лоулер хэлэв.