2024-2025 оны хичээлийн жилд улсын хэмжээнд 292.359 хүүхэд цэцэрлэгт явах хэрэгцээ үүснэ. Үүний 142.150 нь нийслэлд байгаа аж.
Боловсролын ерөнхий газрын даргын 2024.03.25-ны өдрийн "Сургуулийн өмнөх боловсролын байгууллага, ерөнхий боловсролын сургуулийн хамран сургах тойрог тогтоох аргачлал батлах тухай" А/82 дугаар тушаалыг 4 дүгээр сарын 12-ны өдрөөс хүчин төгөлдөр мөрдөж байна. Дээрх хууль, эрх зүйн орчны хүрээнд аймгийн Боловсрол, шинжлэх ухааны газар, нийслэлийн Боловсролын газрын даргын тушаалаар тухайн орон нутгийн хамран сургах тойргийг шинэчлэн тогтоожээ.
Үүний дагуу 2024-2025 оны хичээлийн жилд авах хүүхдүүдээ цэцэрлэгүүд 8 дугаар сарын 1-ний пүрэв гарагаас эхлэн, E-Mongolia системээр бүртгэнэ. Энэ системээр бүртгүүлэх боломжгүй бол харьяа дүүргийнхээ цэцэрлэг дээр ажиллаж буй ажлын хэсэгт хандаж зөвлөгөө, дэмжлэг авахыг нийслэлийн Боловсролын газраас зөвлөж байна. Нийслэлийн дүүрэг бүрийн Боловсролын хэлтэс цэцэрлэгүүдэд ажлын хэсэг гарган, эцэг эхчүүдэд бүртгэлтэй холбоотой мэдээлэл, зөвлөгөө өгөх юм.
Цэцэрлэгийн элсэлт, бүртгэлтэй холбоотой лавлах утасны жагсаалт:
- Нийслэлийн Боловсролын газар: 7011-3039
- Баянгол: 7611-9595
- Баянзүрх: 7010-4005
- Сүхбаатар: 7011-1606
- Сонгинохайрхан: 7017-1110
- Хан-Уул: 11-342470
- Чингэлтэй: 11-315442
- Багануур: 7021-3815
- Багахангай: 7049-1017
- Налайх: 7023-3008
Эцэг эх, асран хамгаалагчдад тавих шаардлага:
- Оршин суугаа газартаа бүртгэлтэй, хаягийн зөрчилгүй байх
- Улсын бүртгэлийн хаягаа элсэлт эхлэхээс өмнө шилжүүлсэн байх
- Түр оршин суугч бол амьдарч буй дүүрэг, хороондоо бүртгүүлсэн байх